Արցախի ՊԲ նախկին հրամանատար Սամվել Բաբայանն օրերս «Ազատության» եթերում հայտարարել է, որ Շուշիի պաշտպանությունը չկարողացան ճիշտ կազմակերպել. «Ոչ մեկը ոչ մեկին չի դավաճանել, չեն կարողացել կառավարել, հասկանում ե՞ք։ Էդ մարդիկ էդ պաշտոններում չպիտի լինեին՝ էդ գեներալները, էդ գնդապետները, չգիտեմ, ովքեր ղեկավարել են, չպիտի էդ պաշտոններում լինեն։ 20 տարի փողով պաշտոն են բաժանել, ծանոթով, բարեկամով: Սա՛ է պատճառը։ Զինվորը ոչ մի մեղք չունի, ինչ զադաչա տվել են՝ փորձել է անի, բայց չի հասկացել, որ աջից խփում են, ձախից խփում են, կապ էլ չունի՝ կողքինին ասի ինչ է կատարվում: Վերջ տվեք խոսելը, որ «մեզ դավաճանեցին, խաբեցին, ծախեցին, հանձնել են, պայմանավորվել են»․․․ Ոչ մեկը ոչ մի բան չի պայմանավորվել, այդ ամբողջ սպայական կազմը պետք է հատ-հատ պատասխան տա՝ ինչու է այդ վիճակը»,-հայտարարել է Սամվել Բաբայանը:
Այս առնչությամբ, «Առաջին լրատվական»-ի հետ զրույցում Շուշիի նախկին քաղաքապետ Արծվիկ Սարգսյանը նշեց, որ այո, Շուշիի պաշտպանությունն անկազմակերպ է եղել և դա փաստ է. «Եթե կազմակերպված լիներ, կպահեին Շուշին, որովհետև դա անառիկ բերդ է: Իհարկե, գեներալիտետի, հրամանատարության մեղքն էլ կար, հենց իրենք պետք է պաշտպանությունը կազմակերպեին: Բոլորի մեղքն էլ կա»:
Դիտարկմանը, որ Սամվել Բաբայանը նաև մեղադրել է, որ պատերազմի ժամանակ Արցախի բանակի շտաբի պետին այսօր նշանակել են Արցախի պաշտպանության բանակի հրամանատար, մինչդեռ հենց բանակի շտաբի պետը ամեն ինչի պատասխանատուն է, Արծվիկ Սարգսյանն ասաց. «Իհարկե, բանակի պատասխանատուն շտաբի պետն է, ինչ էլ լինի, ամեն դեպքում շտաբի պետի վրա է պատասխանատվությունը թե Հայաստանում, թե Արցախում: Բայց որ անկազմակերպ է եղել, դա փաստ է: Կազմակերպվածություն չի եղել, բանակ չի մասնակցել, մոբն է եղել, աշխարհազորն է եղել, նրանց ուժերով է եղել պաշտպանությունը: Այն դիրքը, որտեղ ես եմ եղել, Հադրութի գնդից 20 զինվոր է եղել առանց հրամանատարի: Պետք է հրամանատար լիներ, դիրքավորեր, իրենց պատասխանատու լիներ: Ես ո՞վ եմ, որ ասեմ՝ դիրքավորվեք, եթե մի բան էլ ուրիշ ձև ստացվի, կասեն՝ դու ո՞վ ես, որ զինվորներին հրամայել ես, կարգադրել ես: Մոբը էլի առանց հրամանատարի է եղել: Հայաստանից եկած տղաներ են եղել՝ առանց հրամանատարի: Պետք է հրամանատար լինի, որ ասի՝ որտեղ կանգնեն, ինչպես կազմակերպեն պաշտպանությունը»:
Հարցին, որ ստացվում է, որ դավաճանություն չի եղել, այլ անկազմակերպվածություն է եղել, նա ընդգծեց. «Գուցե էդ անկազմակերպվածությունը հենց դավաճանությունից է գալիս. Եթե կազմակերպվածություն լիներ, դավաճանություն էլ չէր լինի: Ուրեմն մի հիմք եղել է, որ պաշտպանությունը չի կազմակերպվել:
Ես մինչև նոյեմբերի 5-ի երեկոյան ես Շուշիում եմ եղել: Լեռնաշղթայում մարտ եմ վերցրել մեզ վրա, լեռնաշղթայով բարձրանում էին, մենք կանխել ենք: Մենք երեք հոգով էինք, հետո մեզ օգնություն հասավ, արդեն սկսեցինք դրանց փրթել: Մոտ 200-250 ադրբեջանցի բարձրանում էին լեռնաշղթայով, որ մտնեն քաղաք, մենք կանխել ենք: Անկազմակերպվածության հետևանք էր նաև որ 500 ոստըիկան բերել լցրել էին Շուշիի մշակույթի տան մեջ, երբ օդում ադրբեջանական անօդաչուներ էին: Չէր կարելի այդքան մարդ մի տեղ հավաքել, այն էլ Մշակույթի տանը, որի տանիքը թեթև կոնստրուկցիաներ էին»: