«Առաջին լրատվական»-ի զրուցակիցն է Արցախի արտաքին գործերի նախարար Դավիթ Բաբայանը։
-Պարոն Բաբայան, ՊԲ նախկին հրամանատար Սամվել Բաբայանը հայտարարել է, որ հավանական չի համարում պատերազմի վերսկսումը այն տարիների ընթացքում, երբ ռուս խաղաղապահներն այնտեղ են։ Ի՞նչ դիտարկումներ ունեք այս հայտարարության շուրջ, արդյոք իսկապես ռուս խաղաղապահները կարող են դրա երաշխիքը լինել։
–Ես բազմիցս այդ մասին խոսել եմ։ Սամվել Բաբայանը առաջինը չէ, որ այդ մասին խոսում է և վերջինն էլ չէ, որ դրա մասին խոսելու է։ Սա փաստ է, որի մասին մենք մշտապես խոսել ենք և այստեղ մեկնաբանելու որևէ կարիք չկա։
-Ձեր կարծիքով՝ 4 տարի հետո նրանց մանդատը կերկարաձգվի՞, մենք պե՞տք է դա պնդենք, թե ուժեղացնենք սեփական Զինված ուժերը։
-Միանշանակ պետք է այնպես անենք, որ երկարաձգվի, որովհետև խաղաղապահներն իմ կարծիքով հինգ տարով չեն տեղակայվել, քանի որ հակամարտությունը կարգավորված չէ ու դժվար թե կարգավորվի մոտակա հինգ տարիների ընթացքում։ Խնդիրը կա ու չի կարգավորվում, ուստի մենք շահագրգռված ենք, որ նրանց մանդատը երկարաձգվի՝ մինչև վերջնական կարգավորում։
–Սամվել Բաբայանը նաև նշում է, որ պատերազմի ժամանակ իրեն չեն վստահել բանակը, մինչդեռ եթե իր ասած 3 առաջարկներից որևէ մեկը կատարեին, հաղթանակը մերն էր լինելու։ Սա իրականությանը մո՞տ է։
-Ես չեմ կարող այդ հայտարարությունը հաստատել կամ հերքել, չեմ կարող նաև նշել ինչ առաջարկ է եղել, այն ինչքանով է իրատեսական եղել։ Սա ես չէ, որ պետք է ասեմ։ Ես կարող եմ արձանագրել մի բան՝ ունենք այն, ինչ ունենք։ Կարելի՞ էր խուսափել պատերազմից, կարելի՞ էր հաղթել՝ կարծում եմ կարող էինք։ Մարդիկ կարող են մտածել, որ դա սուբյեկտիվ կարծիք է, թեպետ ես դրան հետամուտ եմ։ Հիմա անիմաստ է խոսել այդ մասին, բայց ուշ թե շուտ մենք տարբեր հարցերի պատասխաններ գտնելու ենք։ Այս պահին չափազանց կարևոր է, որ մոտակա տարիներին այնպիսի քաղաքականություն վարենք, որ պահենք ու պահպանենք Արցախը, մնացածը՝ հետագայում ուշ թե շուտ կպարզվեն։ Չի լինելու որևէ բան, որը փորձեն քողարկել ու այդ չդառնա հանրային՝ մանավանդ հանրային տիրույթում, երբ որևէ բան հնարավոր չէ թաքցնել։
