Փսորիազի համաշխարհային օրվա շրջանակում ՀՀ ԱՆ մաշկաբանության ազգային կենտրոնն անցկացնում է իրազեկման շաբաթ ու անվճար խորհրդատվություն՝ հիվանդության հետ կապված:
«Արմենպրես»-ի մամուլի սրահում հրավիրված ասուլիսում ՀՀ առողջապահության նախարարության մաշկավեներաբանության գծով խորհրդատու, ՀՀ ԱՆ մաշկաբանության ազգային կենտրոնի բուժական գծով փոխտնօրեն Հովհաննես Հովհաննիսյանը նշեց, որ ամեն տարի հոկտեմբերի 29-ին՝ Փսորիազի համաշխարհային օրը, առիթ է մեկ անգամ ևս խոսելու հիվանդության մասին, իրազեկելու քաղաքացիներին:
«Փորձը ցույց է տալիս, որ փսորիազ հիվանդության մասին թերի իրազեկման պարագայում առաջանում են կեղծ բժշկական մոտեցումներ, որոնք շատ հաճախ վնասակար են հիվանդների համար: Իրազեկման շաբաթ հայտարարելու հիմնական նպատակը հենց այդ տեղեկացվածության պակասի բացը լրացնելն է»,- ասաց Հովհաննես Հովհաննիսյանը:
Իրազեկման շաբաթի շրջանակում Մաշկաբանության ազգային կենտրոնում կտրամադրվի անվճար խորհրդատվություն քաղաքացիներին:
Մաշկաբանության ազգային կենտրոնի ամբուլատոր պոլիկլինիկական բաժանմունքի վարիչ Սևակ Մկրտչյանի խոսքով՝ իրազեկվածության պակասը հաճախ հանգեցնում են նրան, որ հիվանդներն ինքնաբուժությամբ են զբաղվում, ինչն էլ հանգեցնում է բարդությունների:
«Հիվանդությունը հավասարաչափ հանդիպում է թե´ տղամարդկանց, թե´ կանանց շրջանում: Ասեմ, որ հիվանդների դիմելիությունն ավելացել է, և ունենք հիվանդության երիտասարդացման միտում: Վերջին տարիներին այդ հիվանդությունը հաճախ սկսել ենք նկատել երեխաների մոտ: Չեմ կարող ասել, թե ինչով է պայմանավորված, միգուցե շատ են սկսել դիմել, և ավելի շատ ենք հայտնաբերում, սակայն այսօր շատ ունենք փոքր երեխաներ, որոնք տառապում են այդ հիվանդությամբ: Նախկինում փսորիազը երեխաների շրջանում բավական հազվադեպ հանդիպող հիվանդություն էր»,- ասաց Սևակ Մկրտչյանը:
Մասնագետներն ընդգծում են, որ փսորիազն ամբողջությամբ չի բուժվում, սակայն ժամանակին բժշկին դիմելու պարագայում հնարավոր է ընթացքը դարձնել կառավարելի և բարձրացնել հիվանդի կյանքի որակը: Դրա համար, առաջին իսկ ախտանշանների դեպքում՝ հիմնականում մաշկի վրա թեփոտվող մակերեսով հանգույցների առաջացման պարագայում, մասնագետները հորդորում են դիմել բժշկին: