Ճապոնիայի նոր վարչապետ Ֆումիո Կիսիդան խորհրդարանում դեբատների ժամանակ հայտարարել է, որ երկրի իշխանությունը տարածվում է նաև Հարավային Կուրիլների վրա, փոխանցում է RIA Novosti-ն։
«Անհրաժեշտ է լուծել տարածքների հարցը՝ չթողնելով այն հաջորդ սերունդներին»,-ընդգծել է նա։
Վարչապետը հավելել է, որ Ճապոնիայի կառավարությունը մտադիր է խաղաղ պայմանագիր կնքել Ռուսաստանի հետ՝ կարգավորելով տարածքային պատկանելության խնդիրը։
«Մտադիր եմ շարունակել Ճապոնիայի և ՌԴ-ի միջև հարաբերությունների բազմակողմանի զարգացումը, այդ թվում խաղաղ պայմանագրի կնքման, ինչպես նաև տարբեր ուղղություններով համագործակցության հարցում, մասնավորապես մշակույթի, տնտեսության և քաղաքականության»,-ասել է Կիսիդան։
