Մի քանի օրից կլրանա Վանաձորի համայնքապետ Մամիկոն Ասլանյանի լիազորությունների ժամկետը, և վարչապետը պաշտոնակատար կնշանակի: Լոռու մարզպետ Արամ Խաչատրյանը հայտարարել է, որ այժմ քննարկում են պաշտոնակատարի թեկնածուի հարցը, թե ով ժամանակավորապես՝ մինչև դեկտեմբերի 5-ը տեղի ունենալիք ընտրություններ, կղեկավարի համայնքը։
Մամիկոն Ասլանյանը մինչդեռ պաշտոնակատար նշանակելու կառավարության նախաձեռնությունն անօրինական է համարում։ ՏԻՄ օրենքի իր մեկնաբանությամբ, համամասնական ընտրակարգով ընտրված համայնքապետի լիազորությունները դադարում են հաջորդ համայնքապետի ընտրությունից հետո միայն։ Մասնագիտությամբ իրավաբան համայնքապետը շեշտում է, որ ինքը նաև ավագանու անդամ է, և իրեն ավագանին է ընտրել համայնքի ղեկավար։
Հելսինկյան քաղաքացիական ասամբլեայի Վանաձորի գրասենյակի ժողովրդավարական ինստիտուտների մոնիտորինգի և զեկուցման համակարգող Վարդինե Գրիգորյանը «Առաջին լրատվական»-ի հետ զրույցում ասաց ՝ոչ միայն Մամիկոն Ասլանյանի և Վանաձորի, այլ ընդհանուր բոլոր խոշորացվող համայնքների հետ կապված ՏԻՄ օրենքը նախատեսում է, որ թե՛ ավագանու և թե՛ համայնքի ղեկավարի լիազորությունները վաղաժամկետ դադարեցվում են, եթե վարչատարածքային միավորը փոխվում է, այսինքն տեղի է ունենում վարչատարածքային վերակազմակերպում․ «Այս դեպքում կլիներ խոշորացում, թե խոշորացված համայնքի վերակազմակերպում որպես առանձին համայնք, բոլոր դեպքերում՝ բոլոր համապատասխան բնակավայրերի ավագանիների ու համայնքի ղեկավարների լիազորությունները դադարեցվում են»,-ասաց նա։
Վարդինե Գրիգորյանի խոսքերով՝ սա նշանակում է, որ Վանաձորին միացվող բոլոր համայնքներում ևս ավագանիների ու համայնքապետերի լիազորությունները դադարեցվում են․«Այստեղ չի գործում այն սկզբունքը,որ եթե ինքն ավագանու անդամ է կամ ավագանին պետք է շարունակի իր լիազորությունները մինչև հաջորդ ավագանու առաջին նիստը։ Այստեղ գործում է ՏԻՄ օրենքը։ Ի դեպ ասեմ, որ սա նոր դրույթ չէ։ Ի սկզբանե օրենքում եղել է այնպես, որ վերակազմակերպման դեպքում լիազորությունները դադարեցվում են»։
Մեր զրուցակիցը նշեց՝ ՏԻՄ օրենքում հստակ նշվում է, որ եթե վարչատարածքային միավորն է փոխվել, այդ դեպքում թե՛ ավագանու և թե՛ համայնքի ղեկավարի լիազորությունները վաղաժամկետ դադարեցվում են։ Վարդինե Գրիգորյանը շեշտում է՝ սա օրենքի դրույթ է, որն ընդունվել է դեռ 2002 թվականին․«Իմ նշած հոդվածը, որը վերաբերում է համայնքի ավագանուն, 23-րդ հոդվածն է, հինգերորդ մաս, երկրորդ կետ։ Այստեղ նշվում է, թե էլ ինչ հիմքերով կարող ն դադարեցվել ավագանու լիազորությունները։ Այդ հիմքերից մեկը վարչատարածքային վերակազմակերպումն է»,-եզրափակեց նա։
