Որոշ մանրամասներ են հայտնի դարձել 2020 թվականի հոկտեմբերի 4-ին Շուշիի Մշակույթի տան հրթիռակոծության մասին: Ոստիկանության Շիրակի, Լոռվա ու Տավուշի մարզային վարչությունների մոտ 500 ծառայողներ հոկտեմբերի 4-ին ուղարկվում են ռազմաճակատ՝ Լոռվա մարզային վարչության պետ, գնդապետ Տիգրան Կարապետյանի հրամանատարությամբ:
Երբ ավտոշարասյունը հասնում է Շուշի, Ստեփանակերտում օդային տագնապ է միանում և որոշում է կայացվում առայժմ կանգնել Շուշիում: Տիգրան Կարապետյանի հրամանով 500 ոստիկաններ տեղակայվում են Մշակույթի տան նկուղներում:
Ոստիկանների մոտ որոշակի բողոք է սկսվում առ այն, որ իրենց չեն տրամադրել կանաչ կամուֆլյաժ և ռազմաճակատ են ուղարկվում կապույտ կամուֆլյաժով: Առանց գիտակցելու, որ 500 հոգու մի տեղ հավաքելը արդեն իսկ շատ վտանգավոր է՝ ոստիկաններին հրահանգում են նկուղից բարձրանալ դահլիճ:
Դահլիճում հավաքվելու պահին հենց բալիստիկ հրթիռը հարվածում է շենքի տանիքին, որի արդյունքում 27 ոստիկան մահանում է, շատերը՝ վիրավորվում:
Ավելի ուշ Շուշի է ժամանում ոստիկանության ղեկավար կազմի պատվիրակությունը, որն անգամ չուներ այդ 500 ոստիկանների ցուցակը, գաղափար չուներ հարվածից հետո տարբեր տեղեր ապաստանած ոստիկանների գտնվելու վայրի մասին, տեղյակ չէր, թե քանիսն են զոհվել:
Այս ամենը, ըստ էության խոսում է ոստիկանությունում տիրող հանցավոր անկազմակերպվածության ու ոչ կոմպետենտության մասին: Մինչ օրս որևէ մեկը պատասխանատվություն չի կրել տեղի ունեցածի համար, այդ թվում գնդապետ Տիգրան Կարապետյանը, ով այժմ Արագածոտնի վարչության պետն է:
Այս խնդրի շուրջ «Առաջին լրատվական»-ը զրուցել է Շուշիի քաղաքապետ Արծվիկ Սարգսյանի հետ, ով նշեց, որ երբ ինքը տեսել է մեծ թվով ոստիկանների Շուշիում, հետաքրքրվել, թե ինչ է կատարվում, իրեն ասել են՝ եկել են, որ Արցախում պարետային ժամը հսկեն:
«Ես իմ աշխատասենյակում եմ եղել, երբ հրթիռակոծել են այդ շենքը: Հետո հասել եմ այնտեղ, կազմակերպել ենք առաջին օգնություն, նրանք տարբեր ապաստարաններում են եղել, իրենց սննդի հարցն ենք լուծել:
Էս տղաներին ասել են՝ դիրքեր պետք է տանեն: Իրենք ասել են՝ մեզ չեն ասել, որ դիրքեր ենք գնալու, սկսել են հրաժարվել, բողոքում էին, որ իրենց խաբել են, խաբելով բերել են հասցրել այստեղ: Եկել հավաքվել են Մշակույթի տանը: Ինձ հետ չեն խորհրդակցել, եթե ինձ ասեին՝ այսպիսի բան կա, ես գիտեի, որ Մշակույթի տան շենքը վտանգավոր է, ես չէի թողնի, որ այդքան մարդով այդտեղ հավաքվեին:
Ինձ պատմել են, որ Մշակույթի տանը վեճ է եղել: Բոլորի սմարթֆոնները միացրած է եղել, այդ կապերի միջոցով երևի տեղորոշել են, բացի այդ ԱԹՍ-ն էլ Շուշիի վերևը նկարում էր»,-ասաց Արծվիկ Սարգսյանը:
Հարցին, թե արդյոք 500 ոստիկանի մեկ շենքում հավաքելն արդեն իսկ հանցավոր որոշում չէ՞ր, նա պատասխանեց. «Եթե իրենցից մեկը գար քաղաքի ղեկավարությանը դիմեր, որ այսպիսի հարցով եկել ենք Շուշի, մենք իրենց խորհուրդ կտայինք և կարգելեինք այդտեղ հավաքվել: Պատկերացրեք, այդքան ոստիկան միանգամից քայլելով գալիս էին: Ես ասել եմ, որ դա վտանգավոր է, որովհետև եթե ադրբեջանցիները այդքան շարժ էին տեսնում, անմիջապես անօդաչուն խփում էր: Պետք է գային հարցնեին, կամ եթե ժողով էին ուզում անել, պետք է անեին ապաստարաններում: Կամ գոնե կարելի էր ասել, որ հեռախոսներն անջատեն, նկարահանումներ չանեն:
Չեն հետաքրքրվել, չեն հարցրել: Անգամ մարդիկ զրուցում են, ասում են՝ ինչ-որ մի աղջիկ է եղել, հեռախոսը միացրած դուրս է եկել, դրանից հետո խփել են, իբր ծախված գործ է եղել»,-ընդգծեց նա:
