Վրաստանի իշխող «Վրացական երազանք-Ժողովրդավարական Վրաստան» կուսակցությունը հաղթում է շաբաթ օրը երկրում կայացած տեղական ինքնակառավարման մարմինների ընտրություններում:
Քվեաթերթիկների ավելի քան 99 տոկոսի հաշվարկի արդյունքներով՝ իշխող ուժը մոտ 47 տոկոս է ստացել: Երկրորդ տեղում՝ 31 տոկոսով, նախկին նախագահ Միխեիլ Սաակաշվիլիի ընդդիմադիր «Միացյալ ազգային շարժում» կուսակցությունն է: Երրորդը նախկին վարչապետ Գիորգի Գախարիայի «Հանուն Վրաստանի» կուսակցությունն է, որը ստացել է քվեների մոտ 8 տոկոսը:
Բոլոր հինգ խոշոր քաղաքներում՝ Թբիլիսի, Ռուսթավի, Քութաիսի, Փոթի և Բաթումի, կկայանա ընտրությունների երկրորդ փուլ. թեկնածուներից ոչ մեկին չի հաջողվել հավաքել ձայների ավելի քան 50 տոկոսը:
Ընտրությունների նախօրեին Վրաստան վերադարձավ նախկին նախագահ Միխեիլ Սաակաշվիլին: Նրան ձերբակալել են, քանի որ 2018 թվականին հեռակա կարգով դատապարտվել է պաշտոնեական դիրքը չարաշահելու համար:
«Առաջին լրատվական»-ի հետ զրույցում Սամցխե-Ջավախքի Մեդիա Վերլուծական Կենտրոն -ՀԿ-ի տնօրեն Էդուարդ Այվազյանն ասաց, որ Սամցխե-Ջավախքի շրջանում ընտրությունները բավականին լավ են անցել, ազատ մթնոլորտում, լուրջ միջադեպեր չեն գրանցվել․ «Բնականաբար եղել են փոքրիկ խնդիրներ, որոնք առաջացել են թե Սամցխե-Ջավախքի քաղաքներում, և թե՛ գյուղերում։ Նկատվել են մարդկանց կուտակումներ ընտրատեղամասերից ոչ հեռու, նաև եղել են ուղղորդումների դեպքեր։ Եթե կարելի է դա խախտում համարել, ապա ես միայն դա կնշեմ։ Բայց անցած տարիների համեմատ ընտրություններն ավելի հանգիստ ու խաղաղ մթնոլորտում են անցել և կարծես թե շատ լուրջ խախտումներ չեն գրանցվել»,-նկատեց մեր զրուցակիցը։
Նա հավելեց, որ առանձին տեղերում եղել են դեպքեր, երբ իշխող կուսակցության աջակիցները փորձել են ընտրողներին հուշել, թե ում օգտին քվեարկեն։ Մի քանի տեղ լրագրողները նման դեպքեր ֆիքսել են․«Բայց ընդհանուր առմամբ, նորից նշեմ, որ ընտրություններն անցել են բավականին դրական մթնոլորտում»։
Էդուարդ Այվազյանն ասաց, որ բոլոր քաղաքներում հաղթանակ են տարել իշխող կուսակցության թեկնածուները, քաղաքային խորհուրդներն էլ ձևավորվել են «Վրացական երազանքի»-ի գլխավորությամբ․«Թե՛ քաղաքապետարանների քաղաքային խորհուրդներում և թե՛ քաղաքապետի ընտրություններում իշխող ուժն է հաջողություն գրանցել։ Բոլոր տեղերում երկրորդ հորիզոնականում Միխեիլ Սաակաշվիլիի «Միացյալ ազգային շարժումն է»։ Բայց այն հավաքել է էականորեն ավելի քիչ ձայներ, քան իշխող ուժը։ Եղել են առանձին գյուղեր, որտեղ ընդդիմությունն ունեցել է հաջողություն։ Օրինակ Ախալցխայի շրջանի Վալե կոչվող վայրում, որը փոքրիկ տեղ է՝ ո՛չ քաղաք է, ո՛չ գյուղ։ Այստեղ ընդդիմությունը հաջողություն է գրանցել։ Կան նման գյուղեր, որտեղ ընդդիմությունը հաջողություն ունեցել է, բայց հիմնականում՝ բոլոր խոշոր տեղերում մեծամասամբ իշխող ուժն է հաղթանակ տարել»։
Մեր այն դիտարկմանը, թե կարո՞ղ ենք այս պատկերից եզրակացնել, որ մեր հայրենակիցներն օրինակ գոհ են Վրաստանի իշխանություններից, Էդուարդ Այվազյանն արձագանքեց․ «Այնպիսի շրջաններում, ինչպիսիք են Սամցխե-Ջավախքը, այդ շրջաններում ընտրությունները մի փոքր այլ կերպ են անցնում, մարդկանց մոտեցումն էլ այլ է։ Էթնիկ փոքրամասնությունները միշտ էլ ձայնը տալիս են իշխող կուսակցության օգտին։ Նրանք միշտ էլ քվեարկել են այն ուժերի օգտին, որոնք այդ պահին իշխանության են։ Բայց ասել, որ միանշանակ ազգաբնակչությունը գոհ է իշխանություններից՝ այդպես չէ։ Պարզապես լարվածությունից խուսափելու համար, մարդիկ հիմնականում նախընտրում են ձայնը տալ իշխող ուժին, որպեսզի հետագայում իրենց գյուղերում լարվածություն չառաջանա։ Բայց, կրկնում եմ, դա չի նշանակում, թե խնդիրներ գոյություն չունեն»։
