«Նման որոշում կայացվում է անդամ պետությունների ցանկությամբ` եթե անդամ պետությունները որոշեն, որ կազմակերպությունը պետք է այսպիսի որոշում իրականացնի, ապա այն կիրականացնի»,- «Առաջին լրատվական»-ի հետ զրույցում՝ անդրադառնալով ՀԱՊԿ գագաթնաժողովում կայացրած որոշման վերաբերյալ ռուսական «Կոմերսանտ» պարբերականի հրապարակմանը, կարծիք հայտնեց ՀՀ ԱԳՆ ՆԱՏՕ-ի բաժնի նախկին վարիչ Մարթա Այվազյանը:
Նշենք, որ «Կոմերսանտի» տեղեկություններով՝ Աստանայում կայացած ՀԱՊԿ գագաթնաժողովի ժամանակ որոշում է կայացվել ՀԱՊԿ-ը դարձնել միջոց՝ հակազդելու հետխորհրդային տարածքում սկսվելիք «գունավոր հեղափոխություններին», ինչպես նաև ստեղծել արագ արձագանքման խումբ, որը կարող է միջամտել, եթե արաբական հեղափոխությունների սցենարով զարգացումներ տեղի ունենան ՀԱՊԿ անդամ երկրներում:
Այվազյանը նշեց, որ այս որոշումը պայմանավորված է բիշքեկյան իրադարձություններով: Նա հիշեցրեց, որ այն ժամանակ քննարկումներ կային, թե ինչքանով ՀԱՊԿ-ը կարող է միջամտել Բիշքեկում տեղի ունեցող իրադարձություններին. «Բիշքեկի իրադարձությունները ինչ-որ չափով սկիզբ դրեցին նման քննարկումների, արաբական հեղափոխություններն իրենց հերթին որոշակի մտահոգություն առաջացրին, և ՀԱՊԿ անդամ երկրները որոշեցին նման գործառույթ վերագրեն նաև ՀԱՊԿ-ին և կազմեն համապատասխան արագ արձագանքման ուժեր»:
Մարթա Այվազյանի գնահատմամբ՝ այն, ինչ տեղի է ունենում ՀԱՊԿ-ում սկզբունքորեն պայմանավորված է Ռուսաստանի շահերով, որովհետև ՀԱՊԿ-ի գլխավոր շարժիչ ուժը Ռուսաստանն է: