Աֆղանստանի դիմադրության ուժերի և «Թալիբան» արմատական շարժման զինյալների միջև բախումները շարունակվում են Փանջշիր, Փարվան և Բաղլան նահանգների տարբեր շրջաններում, հաղորդել է «Ասվակա»-ն :
Աղբյուրը նշում է, որ մարտերը սկսվել են երեքշաբթի՝ տեղական ժամանակով 23:00-ի սահմաններում, զինյալների հարձակումից հետո և դեռ շարունակվում են: Զոհերի թիվն այս պահին անհայտ է:
Երեքշաբթի արմատական շարժման ներկայացուցիչները հանդես եկան հայտարարությամբ այն մասին, որ իրենց հաջողվել է գրավել երեք կարևոր տարածք և Փանջշիրի անցումները, և որ նրանք շուտով կհայտարարեն «ամբողջական հաղթանակի» մասին: Ավելի ուշ դիմադրության ուժերը հերքել են այս տեղեկությունը:
Անցյալ շաբաթ Ազգային դիմադրության ճակատի և «Թալիբանի» պատվիրակության միջև առաջին ուղիղ բանակցությունները տեղի ունեցան Չարիքար քաղաքում (Փարվան նահանգի վարչական կենտրոն): Ինչպես ՏԱՍՍ-ին հայտնել է Փանջշիրի աշխարհազորայինների ներկայացուցիչ Ֆահիմ Դաշտին, հյուսիսային Աֆղանստանում ռազմական գործողությունների դադարեցման շուրջ արմատականների հետ համաձայնության գալու հարցը դեռ քննարկման փուլում է: Ավելի վաղ նա նշել էր, որ այն տարածաշրջանի ղեկավարությունը, որը չի ենթարկվել թալիբներին, համաձայն չէ «տարբեր էթնիկ խմբերի խորհրդանշական ներկայացուցիչներից» կազմված կառավարության հետ և ցանկանում է հասնել իսկապես ներառական կառավարության ձևավորմանը: