Իրանը հայտարարել է, թե հուսով է Գորիս-Կապան ճաապարհի արգելափակման խնդրի հանգուցալուծում, որը չի խոչընդոտի ռեգիոնալ ապաշրջափակման օրակարգին: Իրանի խնդիրը անշուշտ լոկ այն չէ, որ փակվել է Գորիս-Կապան ավտոճանանապրհը, որն Իրանից Երևան և Վրաստան ուղին է: Թեհրանին անհանգստացնողը անշուշտ ավելի խորքային հանգամանքներն են, որ կարող են պարունակվել տեղի ունեցածի ներքո:
Գործնականում, Ադրբեջանը կատարում է քայլ, որը ակնհայտորդն դուրս է դնում Իրանը ռեգիոնից, առնվազն Հայաստանի մասով:
Հասկանալի է, որ խնդիրն ավելի շատ խորհրդանշական տիրույթում է, սակայն հենց այստեղ է նաև քաղաքան տողատակը: Ադրբեջանի գործողությունների համատեքստում ակնհայտ է ոտնձգությունն իրական շահի և հետաքրքրության նկատմամբ, ու թեև այն կրում է անուղղակի բնույթ, սակայն տեսանելի է Թեհրանի համար, ինչին էլ արձագանքել է հարևան պետությունը: Պարզ չէ, թե ինչ խմորումներ կարող են ծավալվել ադրբեջանական հանդգնության տողատակում, և դրանք ինչ իրական վերաբերմունքի կարող են արժանանալ թե Ռուսաստանում ու Թուրքիայում, և թե նաև Միացյալ Նահանգներում, որոնք անկասկած ռեգիոնալ զարգացումներում ոչ ուղիղ ակտիվությամբ, սակայն առանցքային դերով ներգրավված սուբյեկտ են:
Բանն այն է, որ Հայաստանը Թեհրանի համար ռեգիոնալ «սուբյեկտության» առանցքային գործոն է, որովհետև այլընտրանքն է Ադրբեջանին: Եթե Իրանը ռեգիոնի հետ լայն կապի առումով մնա Բաքվի հույսին, ապա այստեղ Թեհրանին սպասում են անշուշտ լուրջ խնդիրներ: Իրանն այդ պարագայում ուղղակի դադարելու է լինել ռեգիոնալ խաղի լուրջ մասնակից: Իհարկե, կասկած չկա, որ ժամանակի հարց կլինի Հայաստան-Իրան նոր ավտոճանապարհի հարցը, որը հեռու կլինի սահմաններից և առավել ևս չի անցնի վիճելի համարվող որևէ տարածքով: Սակայն, նախ դա պահանջելու է տևական ժամանակ, և բացի այդ, կրկնենք, որ ներկայիս իրավիճակը Իրանի հանդեպ ունի խորհրդանշական բնույթ: Այլ կերպ ասած, պայմանականորեն՝ զոնդաժի տրամաբանություն:
Ինչպե՞ս կարձագանքի Իրանը, քաղաքական ի՞նչ ներուժով կամ կշռով է ունակ արձագանքել Թեհրանը ստեղծված իրավիճակին, և հետևաբար որքան է հետագայում ավելի լուրջ ճնշում, թեկուզ անուղղակի, բայց աստիճանաբար աճող ճնշում բանեցնելը: Այստեղ է, որ Գորիս-Կապան ճանապարհին ստեղված իրադրությունը «քննություն» է Իրանի համար, որ կազմակերպել է Ադրբեջանը: Կամ, ավելի շուտ, որի կազմակերպիչներին ուզում է հասկանալ Թեհրանը, Բաքուն դիտարկելով գուցե ընդամենը իրականացնողի դերում:
