ՀՀ վարչապետ Նիկոլ Փաշինյանը սեպտեմբերի 8-ին պաշտոնական այցով կմեկնի Վրաստան։ Երևանը մտադիր է Թբիլիսիի հետ քննարկել երկկողմ օրակարգի առանցքային մի շարք հարցեր։
Իր այցի և ժամկետների մասին հայտարարել է հենց Նիկոլ Փաշինյանը, Ազգային ժողովում ներկայացնելով կառավարության ծրագիրը։
«Բազմազգ Վրաստան» նախաձեռնության ղեկավար Առնոլդ Ստեփանյանը Փաշինյանի այցը Վրաստան կարևոր է համարում․«Միշտ այս մակարդակի այցերը կարևոր են, երբեք հանգստանալու չեն գնալու։ Իհարկե կան հարցեր, որոնք մշտական աշխատանքի կարիք ունեն։ Մասնավորապես ՝նախքան այցը մի քանի ուղղություն մատնանշվեց, ինչպիսին է օրինակ տնտեսական ինտեգրացիայի զարգացումը, տուրիզմի զարգացումը, հնարավոր է նաև երկու երկրների տուրիստական պոտենցիալների միավորումը։ Ես անձամբ մի քանի տարի առաջ Հայաստանին առաջարկել եմ Վրաստանի հետ սահմանային իրավիճակների տուրիզմի հարցը։ Մեծ հաշվով, զարգացման մեծ պոտենցիալ կարող է լինել։ Իմ կարծիքով՝ հիմա կամաց-կամաց գալիս են այդ գաղափարների իրագործմանը։ Շատ լավ կլինի, եթե այդ ուղղություններով ճանապարհային քարտեզ մշակվի»,-«Առաջին լրատվական»-ի հետ զրույցում ասաց նա։
Մեր զրուցակցի խոսքերով՝ քննարկման առանձին հարց է անվտանգությանն առնչվող խնդիրները․«Դուք գիտեք, որ մշտապես հարցեր են առաջանում ՀԱՊԿ-ի ու ՆԱՏՕ-ի միջև։ Միևնույն ժամանակ տարածաշրջանում անընդհատ իրավիճակ է փոխվում։ ՆԱՏՕ-ի անդամ Թուրքիան Ռուսաստանի հետ համագործակցության իմաստով հիմա շատ ավելի մոտ է, քան նույնիսկ ՀԱՊԿ շատ անդամներ։ Իմ կարծիքով՝ այդ ամենը շատ լրջորեն անդրադառնում է Հարավային Կովկասի հետագա ճակատագրի պլանավորման հարցի վրա։ Իհարկե շատ լավ է, որ Հայաստանի ու Վրաստանի իշխանությունների միջև կոնտակտը պահպանվում է, պատերազմից հետո շփումները շարունակվում են։ Իմ դիտարկմամբ՝ սպասվող այցն ամենատարողունակն է լինելու իր բովանդակությամբ։ Հայաստանում անցկացվեցին ընտրություններ և իրավիճակը կամա թե ակամա հանդարտվելու է։ Ուստի շատ հանգիստ կերպով կարելի է պլանավորել շատ հարցեր։ Չեմ բացառում, որ Հայաստանը կարող է Վրաստանի ու Ռուսաստանի միջև որոշակի միջնորդական դեր ստանձնել։ Կարծում եմ, որ Հայաստանն ինքն էլ կցանկանար այս հարցում իր դերը բարձրացնել»։
Խոսելով այն մասին, որ կառավարության 2021-2026 թվականների ծրագրում Վրաստանի հետ առնչվող հարաբերություններում մատնանշվում է հայ-վրացական սահմանազատման խնդիրը և այն իրականացնելու անհրաժեշտությունը, Առնլոդ Ստեփանյանը նկատեց․«Իմ կարծիքով դա այժմ շատ կարևոր է, հատկապես այն ամենի ֆոնին, ինչ այսօր տեղի է ունենում Հայաստանի ու Ադրբեջանի միջև։ Շատ վատ է, երբ սահմանները գծված չեն։ Իհարկե ես հեռու եմ այն մտքից, որ համեմատեմ հայ-վրացական հարաբերությունները հայ-ադրբեջանական հարաբերությունների հետ, բայց ցանկացած դեպքում սահմանները պետք է գծված լինեն, որ միջադեպերը հնարավորինս քիչ լինեն։ Առավել ևս, որ հայ-վրացական սահմանին միջադեպեր պարբերաբար լինում են՝ օրինակ անասունների առևանգում կամ կորուստ, սահմանի ապօրինի հատում։ Հայաստանն, ըստ ամենայնի, ուզում է մեկընդմիշտ լուծել սահմանազատման հարցը ու հետագա սերունդների համար հավելյալ խնդիրներ չթողնել»։