Կենտրոնական ընտրական հանձնաժողովի նախագահ Գարեգին Ազարյանն այսօր լրագրողների հետ հանդիպման ժամանակ պատասխանելով «Առաջին լրատվականի» հարցին, թե արդյո՞ք պատրաստ է ԿԸՀ-ն արտահերթ ընտրություններին, նշեց, որ ԿԸՀ-ն գործում է Ընտրական օրենսգրքով սահմանված կարգով, իսկ այնտեղ կան դրույթներ, որոնց կատարումն ուժի մեջ է մտնելու 2012 թվականի հունվարի 1-ից. «Եզրակացությունը թողնում եմ ձեզ, թե արդյո՞ք պատրաստ է այսօր ԿԸՀ-ն արտահերթ ընտրությունների, ես կարծում եմ, որ Ընտրական օրենսգիրքն էլ այսօր պատրաստ չէ իրականացնել արտահերթ ընտրություններ:
Այնուամենայնիվ, եթե խոսքը գնա այդ մասին, ապա առաջին հերթին պետք է փոփոխություն իրականացնել Ընտրական օրենսգքում»: Ազարյանը նշեց այն հիմնական պատճառները, որոնք թույլ չեն տալիս այս պահին արտահերթ ընտրություններ իրականացնել: Նա ասաց,որ եթե այսօր լինեն արտահերթ ընտրություններ,ապա ԿԸՆ-ն չի կարող օգտագործել տեղամասային ընտրական հանձնաժողովի անդամի անհատական կնիքը, որը նորություն է և փոխարինելու է վերջինիս ստորագրությանը, ինչպես նաև հնարավոր չի լինի իրականացնել ԸՕ-ով նախատեսված անձնագրի թանաքավորման պահանջը, որի նպատակն է խուսափել կրկնակի քվեարկությունից, քանզի այդ թանաքը մնում է 12 ժամ: Ազարյանն անարդյունավետ է համարում ընդդիմության կողմից առաջարկվող թանաքավորման մեթոդը : Նա նշեց,որ տարբեր երկրների փորձի ուսումնասիրությունը ցույց է տալիս, որ դա չի օգնում խուսափել կրկնակի քվեարկությունից:
«Մեր ԸՕ-ն ավելի մեծ մեխանիզներ է դրել կրկնակի քվեարկությունից խուսափելու համար՝ մատ թանաքոտելը, ընդամենն անհրաժեշտ է, որպեսզի կուսակցություններն ունենան անաչառություն, լինեն անկաշառ մարդիկ, և ընտրությունը լինի այնպես, ինչպես ուզում ենք ես և դուք»: Հարցին, թե արդյոք ԿԸՀ-ն բացառո՞ւմ է արտակարգ իրավիճակները, օրինակ, ասենք, սեպտեմբերին ինչ-որ դեպք պատահի նախագահի հետ, Ազարյանը պատասխանեց. «Աստված չանի, բայց ես դրա մասին մտածելու խնդիր չունեմ, այդ մասին պետք է մտածեն նրանք, ովքեր ընդունում են օրենքը: Պետք չէ խառնել լիազորոթյունները և թույլ չտալ որևէ մեկը ուզուրպացնի ԱԺ լիազորությունները, ուստի ԿԸՀ-ն Ընտրական օրենսգրքում փոփոխություններ կատարող մարմին չէ»:
