Կանադայի իշխանությունները մտադիր են Աֆղանստանի բնակչության խոցելի խմբերից 20 հազար քաղաքացու ընդունել՝ արմատական «Թալիբան» շարժման հարձակումների ֆոնին։ Այս մասին հայտնել է հյուսիսամերիկյան երկրի միգրացիայի, փախստականների և քաղաքացիության հարցերով նախարարության մամուլի ծառայությունը։
Ժամանող փախստականների համար կգործարկվեն օժանդակության հատուկ ծրագրեր։
Հիշեցնենք, որ ապրիլի 14-ին ԱՄՆ նախագահ Ջո Բայդենը հայտարարեց Աֆղանստանում 20-ամյա օպերացիան ավարտելու որոշման մասին, որն ամենատևական օտարերկրյա ռազմարշավն է ամերիկյան պատմության մեջ։ Դրա ֆոնին հանրապետության անվտանգության ոլորտում արձանագրվեց իրադրության կտրուկ վատթարացում։
Ըստ տարբեր աղբյուրների՝ արմատականները վերահսկում են երկրի տարածքի 60-85 տոկոսը, այդ թվում 5 պետությունների (Իրան, Չինաստան, Պակիստան, Տաջիկստան, Թուրքմենստան) հետ սահմանակից շրջանները։
