«Առաջին լրատվական»-ի հարցերին պատասխանել է Թբիլիսիի Black Sea Press գործակալության գլխավոր խմբագիր, քաղաքագետ Գելա Վասաձեն
Պարոն Վասաձե, ռուս սահմանապահները գտնվում են Տավուշւի մարզի որոշ գյուղերում: Կա տեսակետ, որ ռուսական զորքերի տեղակայումը Վրաստանին սահմանակից այդ հատվածներում կարող է խնդիրներ առաջացնել: Կիսո՞ւմ եք այդ տեսակետը:
Ես կարծում եմ, որ այդ որոշումը գտնվում է Հայաստանի կառավարության իրավասության ներքո: Եթե ռուս սահմանապահները իրենց պարկեշտ դրսևորեն, խնդիրներ չեն լինի: Այլ բան է, որ անհասկանալի է, թե ինչու են պետք ռուս սահմանապահներ Վրաստանի հետ սահմանին: Հետևաբար, ես կասկածում եմ, որ նրանք այդտեղ կտեղակայվեն: Առավել ևս, որ ՌԴ սահմանապահների այդտեղ գտնվելը իսկապես կարող է խնդիրներ ստեղծել: Օրինակ, Հայաստանի և Վրաստանի սահմանների որոշ հատվածներում դելիմիտացիա չի եղել: Ի՞նչ տեղի կունենա, եթե ռուս սահմանապահները ինքնակամ զբաղեցնեն վիճելի հատվածները: Դա կարող է հարվածի տակ դնել հայ-վրացական հարաբերությունները:
Ընդհանուր առմամբ, ինչպե՞ս եք գնահատում Հայաստանի շուրջ ստեղծված իրավիճակն ու սահմանային լարվածությունը:
Ես դա գնահատում եմ որպես Հայաստանի և Ադրբեջանի միջև պատերազմի բաղկացուցիչ մաս, որը շարունակվում է ավելի քան 30 տարի: Այդ լարվածության ընթացքում կողմերից յուրաքանչյուրը, իսկ դրանց թիվը երեքն է, լուծում է իր խնդիրները:
Այդ դեպքում կարո՞ղ են լարվել նաև Հայաստանի և Վրաստանի հարաբերությունները:
Հարաբերությունները կարող են լարվել ռուս սահմանապահների կողմից սադրանքի դեպքում: Անկեղծ ասած, ես չեմ հասկանում հայ-վրացական սահմանի վերահսկողությունը Ռուսաստանին տալու իմաստը:
Թուրքիան արդեն Հայաստանին կոչ է անում զերծ մնալ ագրեսիվ հռետորաբանությունից: Ինչպե՞ս եք սա գնահատում, ինչ է սա նշանակում:
Դա նշանակում է, որ Թուրքիան նույնպես խաղի մեջ է: Իրականում այդ հայտարարությունը ոչ այնքան Հայաստանին է ուղղված, որքան Ռուսաստանին: Դա կարելի է թարգմանել այսպես. Մենք ամեն ինչ տեսնում ու հասկանում ենք, թե ինչ է տեղի ունենում. Восток дело тонкое:
