Նախօրեին հայ-ադրբեջանական սահմանի հյուսիս-արևելյան հատվածում ընթացող տեղային մարտերի արդյունքում հայկական կողմն ունի 3 զոհ, 4 վիրավոր։ Չնայած սահմանային լարվածությանը՝ քաղաքական որոշ շրջանակներ, ֆեյսբուքյան օգտատերեր շարունակում են անթաքույց հրճվել։
Քաղաքագետ Ռուբեն Մեհրաբյանի գնահատմամբ՝ նրանց պահվածքը բացարձակ զարմանալի չէ, բայց դա մի կողմից, մյուս կողմից ավելի վտանգավոր են այն հրապարակումները, որոնք միտված են խուճապ տարածելուն․ «Ուղղակի մեր պետության անվտանգության համար պատասխանատու մարմինները պետք է գնան դրանք հրապարակողների հետևից։ Նման հրապարակումներին պետք է տրվի համապատասխան քրեաիրավական գնհատական։ Ի վերջո, մեր օրենսդրությունում ակնհայտ կեղծ տեղեկատվության հիման վրա խուճապ տարածելուն ուղղված դեզինֆորմացիան պետք է լինի պատժելի»,-ասաց Մեհրաբյանը «Առաջին լրատվական»-ի հետ զրույցում։
Խուճապ տարածողների նպատակները, նրա խոսքով, չեն փոխվել, մնում են նույնը, այն է՝ ՀՀ իշխանությանը թուլացնել Հայաստանը թուլացնելու գնով և լուծել իրենց լափամանին մոտ լինելու խնդիրը։
Հարցին՝ որքանով է հաջողվում նրանց խուճապ տարածել հանրության շրջանում, քաղաքագետը նշեց․«Ինչպես տեսնում ենք, շատ առուներով այլևս չի ստացվում խուճապ տարածել, կամ եթե ստացվում է, կարճ կյանք է ունենում, բացի իրենց վարկաբեկելուց, այլ բան չի մնում։ Մեր մեջ ապրում են մարդիկ, որոնք մեր հայրենակիցներն են, բայց թքած ունեն մեր հայրենիքի վրա, իսկ դա բացի դառնությունից, այլ զգացողություն չի կարող առաջացնում։ Արհամարհական խղճահարություն պետք է լինի նման մարդկանց նկատմամբ»,-հավելեց Մեհրաբյանը։
Լուսանկարը՝ panorama.am-ի
