Համաշխարհային բանկի աջակցությամբ իրականացվող «Համայնքների գյուղատնտեսական ռեսուրսների կառավարման և մրցունակության» ծրագրի շրջանակներում առաջիկա տարիներին հանրապետության վեց մարզերի 55 գյուղական համայնքներում կիրականացվեն արոտների բարելավման և արդյունավետ օգտագործման համալիր միջոցառումներ,- ասվում է ՀՀ գյուղատնտեսության նախարարության պաշտոնական կայքում:
Այդ նպատակով 2011 թվականին ՀՀ Արագածոտնի, Լոռու, Շիրակի, Տավուշի, Գեղարքունիքի և Սյունիքի մարզերի 40 համայնքներում կազմակերպվել են շուրջ 80 հանդիպումներ ու ժողովներ, որոնցում քննարկվել են արոտների կառավարմանն ու անասնապահության զարգացմանը միտված համայնքային ծրագրեր, ինչպես նաև անցկացվել «Արոտօգտագործողների միություն» սպառողական կոոպերատիվների հիմնադիր ժողովներ:
Ծրագրի շրջանակներում կբարեկարգվեն արոտավայրերի ճանապարհները, կստեղծվեն կենդանիների ջրելատեղեր, անասնապահների կացարաններ, իսկ առանձին արոտակտորներում կիրականացվեն էլեկտրամատակարարման և ֆերմերների կենցաղային պայմանների բարելավման աշխատանքներ:
