ԵԱՏՄ-ն և Իրանը ազատ առևտրի մասին նոր համաձայնագիր կստորագրեն: Թեհրանում մեկնարկել է ԵԱՏՄ երկրների ու Իրանի միջև ազատ առևտրի մասին համաձայնագրի ստորագրման հարցով հանդիպումը: Իրանի հետ համաձայնագրի կնքման համար առաջին ամբողջական ձևաչափով բանակցությունների փուլը նախատեսված է այս տարվա սեպտեմբերին: Նոր համաձայնագիրը փոխարինելու է 2019 թվականի հոկտեմբերին կնքված ժամանակավոր համաձայնագրին:Այս թեմայի շուրջ «Առաջին լրատվական»-ը զրուցել է իրանագետ Արմեն Վարդանյանի հետ, ով նշեց, որ Հայաստանը միանշանակ այս համաձանագրի շահող երկրներից մեկն է, որովհետև ի տարբերություն ԵԱՏՄ մյուս երկրների, ցամաքային սահման ունի Իրանի հետ:
«Դա միանշանակ կաշխուժացնի Հայաստան-Իրան առևտրային կապը: Եթե հաշվի առնենք, որ Իրանը մոտ է միջուկային համաձայնագրին վերադառնալուն, որը նաև կբերի պատժամիջոցների չեղարկման, ապա դա լայն հնարավորություններ է ստեղծում Հայաստանի համար՝ զարգացնելու հարաբերությունները, առևտրային կապերը Իրանի հետ»,-ասաց իրանագետը՝ հիշեցնելով, որ դեռևս 2019-ին կնքված համաձայնագրի լոկոմոտիվներից մեկը հենց Հայաստանն էր, որն առաջ էր տանում այդ գաղափարը, բանակցություններում ակտիվ դեր էր ստանձնել:
Հարցին, թե որքանով է հնարավոր, որ Իրանի նորընտիր նախագահն իր առաջին այցը կատարի Հայաստան, կամ Փաշինյանն իր առաջին այցը կատարի Իրան, Արմեն Վարդանյանը պատասխանեց. «Ռեիսին պահպանողական քաղաքական գործիչ է և դեռևս ինչ-որ առումով հանելուկային, բայց կարծում եմ՝ Հայաստանն ինքը պետք է նախաձեռնողականություն դրսևորի և շատ հարցերում նոր օրակարգ առաջարկի իրանական կողմին:
Այսօր դեռևս երկու կողմերն էլ սահմանափակ հնարավորություններ ունեն. Հայաստանը պատերազմ է տեսել, բավական ծանր տնտեսական վիճակում է, Իրանի տնտեսությունն էլ ամերիկյան պատժամիջոցների հետևանքով կաթվածահար վիճակում էր:
Իհարկե, մեր երկրների միջև ծրագրեր են քննարկվում, նաև որոշները իրագործվում, բայց դրանք փոքր ծրագրեր են: Հիմա Հայաստանը վերջին ամիսներին բավական արագ զարգացնում է տնտեսությունը, Իրանը նույնպես ամենայն հավանականությամբ կազատվի պատժամիջոցներից, որն ահռելի հնարավորություններ կբացնի իրանի համար»:
Նրա խոսքով, հայ-իրանական հարաբերությունների զարգացման համար ևս մեկ նպաստող հանգամանք է ԵՄ-ի կողմից Հայաստանին տրվող 2,6 մլրդ եվրոյի աջակցությունը. «Այդտեղից 600 մլն եվրոն պետք է ծախսվի Հյուսիս-Հարավ մայրուղու ՀՀ հարավային հատվածի կառուցման համար: Սա նաև հնարավորություն է բացելու իրանական կողմի համար: Իրանական ապրանքները կարող են օգտվել այդ մայրուղուց և այդ ճանապարհով դուրս գալ Վրաստան, ապա այլ երկրներ»:
