Ֆրանսիայի իշխանությունները չեն բացառում, որ առաջիկայում որոշ շրջաններում որոշ սահմանափակումներ կվերականգնվեն՝ ներառյալ պարետային ժամը, կորոնավիրուսի տարածման աճի հետ կապված սանիտարական իրավիճակի վատթարացման պատճառով: Այս մասին երկուշաբթի օրը հայտարարել է Ֆրանսիայի ԱԳՆ պետքարտուղար Կլեման Բոնը BFM հեռուստաալիքի եթերում:
«Հնարավոր է»,- ասել է նա՝ պատասխանելով համապատասխան հարցին: Ըստ նրա՝ երկրի նախագահ Էմանուել Մակրոնը հուլիսի 12-ի հեռուստատեսային կոչի ժամանակ նշել է, որ ֆրանսիական շրջանների պրեֆեկտները կարանտինային սահմանափակումներ մտցնելու իրավունք կունենան: «Միջոցառումները պետք է համապատասխանեն իրավիճակի սրությանը»,- շեշտել է պետքարտուղարը:
«Համաճարակը հաղթահարելու միակ միջոցը պատվաստումն է»,- հիշեցրել է նա:
Հուլիսի 18-ին հանրապետության առողջապահության նախարարությունը հայտնել է, որ օրական Ֆրանսիայում կորոնավիրուսային վարակի ավելի քան 12 հազար նոր դեպք է հայտնաբերվել: Փորձագետների կարծիքով՝ այդ ցուցանիշը վկայում է երկրում համաճարակի նոր ալիքի մասին:
