«Առաջին լրատվական»-ի զրուցակիցն է Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանը։
-Տիկին Վարդանյան, Հայաստանում անցկացված արտահերթ խորհրդարանական ընտրություններից հետո , երբ իրավիճակը Հայաստանում քիչ թե շատ կայունանա ի՞նչ է հնարավոր սպասել հայ-ամերիկյան օրակարգում, ի՞նչ առաջնահերթություններ եք դուք տեսնում։
-Բայդենի վարչակազմը հետաքրքրված է եղել Հայաստանով, իսկ ընտրություններից հետո ԱՄՆ-ն գիտի, որ կան մեծ հնարավորություններ երկկողմ հարաբերությունները բարելավելու համար։ Քանի որ դեռ Սահմանադրական դատարանի վերջնական որոշումը չկա, վարչապետը դեռ նախարարներ չի նշանակում, դա որոշակիորեն սպասողական իրավիճակ է ստեղծում։ Բայց դա չի նշանակում, որ ԱՄՆ-ն կամ մեր կազմակերպությունները չեն խոսում ՀՀ քաղաքական գործիչների հետ։ ԱՄՆ-ի հետաքրքրությունը շատ մեծ է ամենատարբեր ոլորտներում։
–Ամերիկայի հայկական համագումարի հոգաբարձուների խորհրդի համանախագահ Էնթոնի Բարսամյանը իր հարցազրույցում նշել է, որ ԱՄՆ-ն հետաքրքրություններ ունի Հայաստանում ենթակառուցվածքային նախագծերի հետ կապված։ Որո՞նք են դրանք ըստ Ձեզ։
-Օրինակ՝ ԱՄՆ-ն շատ հետաքրքրված է ջրի հետ կապված, որ ջուրը ճիշտ ձևով մատակարարվի։ Աշխատում է կառավարության հետ ամենատարբեր ոլորտներում՝ կարող է դա լինել իրավաբանական, անվտանգության ոլորտներ։ Այժմ ընթանում են խոսակցություններ, թե դա ինչպես կարող է իրականանալ։ Ավելացնեմ, որ կա ցանկություն, որ ԱՄՆ-ն ու Հայաստանը նորից սկսեն ակտիվ հանդիպումներ այն բոլոր հարցերի շուրջ, որոնք ծառացած են Հայաստանի առջև։ Ուզում են իմանալ, թե ինչպես կարող են Հայաստանի հետ աշխատել այդ հարցերի շուրջ։Երևանն էլ իր հերթին պետք է քայլեր անի։
-Հայաստանը, որը տարիներ շարունակ և հատկապես պատերազմից հետո մեծ կախվածություն է ձեռք բերել Ռուսաստանից, կարո՞ղ է համագործակցել ԱՄՆ-ի հետ։
-Ես գիտեմ, որ Հայաստանը միշտ էլ Ռուսաստանից մեծ կախվածություն է ունեցել։ Բայց նաև գիտեմ, որ Հայաստանը մշտապես ունեցել է մեծ ցանկություն աշխատել Միացյալ Նահանգների հետ։ Հայաստանը, ինչպես որ բոլոր երկրները, պետք է աշխատի ի շահ իր գործերին։ Ինքը չի կարող միայն մեկ երկրի հետ լավ հարաբերություններ ունենալ։
-Այսինքն դիվերսիֆիկացնի իր արտաքին քաղաքականությունը։
-Այո, Հայաստանը պարտավոր է դա անել։
