Գերմանիայում 133 մարդ է զոհվել ավերիչ ջրհեղեղի հետեւանքով։ Այս մասին հուլիսի 17-ին հայտնել է գերմանական Bild պարբերականը։
Ոստիկանության տվյալներով՝ Հյուսիսային Ռեյն-Վեստֆալիա դաշնային հողում զոհվել է առնվազն 43 մարդ, առնվազն 90-ը ՝ Ռեյնլանդ-Պֆալց շրջանում:
Գերմանիայի արևմուտքում Արվայլեր շրջանի իշխանությունները հայտնել են, որ անհետ կորած է շուրջ 1.3 հազար մարդ: Մարդկանց գտնելու համար գործի են դրվել ոստիկանական ուղղաթիռներ։
Շուլդ կոմունայում ջրհեղեղը հանգեցրել է բնակելի տների փլուզման, տասնյակ շենքեր փլուզման վտանգի տակ են:
Հատկապես բարդ իրավիճակ է ստեղծվել Ալտենա, Զոլինգեն և Ռայնբախ քաղաքներում, Արվայլեր և Ուննա շրջաններում։ Շատ բնակավայրերում արտակարգ դրության ռեժիմ է հայտարարվել։
Գերմանիայի պաշտպանության նախարարությունը ռազմական աղետի ռեժիմ է սահմանել երկրի արևմուտքում։
Առանց խմելու ջրի են մնացել Էշվայլեր քաղաքի բնակիչները։ Ջրհեղեղը վնասել է ջրատար համակարգը, որը խմելու ջուր է մատակարարում ավելի քան 56 հազար բնակիչների։
Տարածաշրջանի ավելի քան 100 հազար բնակիչներ մնացել են առանց էլեկտրականության։
DPA-ն հայտնում է, որ Շտոլբերգում կողոպտիչները սկսել են ոսկերչական խանութներ թալանել։ Չարագործները նաև փորձել են կողոպտել սուպերմարկետը և տնտեսական ապրանքների խանութը, սակայն փախուստի են դիմել ոստիկանության ժամանումից հետո:
