Թուրքական նավը կրակ է բացել կղզու հյուսիս-արևմուտքում գտնվող Տիլիրիա շրջանում գտնվող Կիպրոսի առափնյա պահպանության նավի վրա, հաղորդում է Կիպրոսի CNA լրատվական գործակալությունը:
«Թուրքիայի առափնյա պահպանության լուրջ սադրանքը՝ Կիպրոսի Հանրապետության առափնյա պահպանության նավի վրա կրակ բացելը, որը կանոնավոր պարեկություն է իրականացրել, տեղի է ունեցել լուսադեմին Կատո Պիրգոս Տիլիրիայի ծովային տարածքում։ Ոստիկանության տվյալներով՝ առավոտյան 3.30-ի սահմաններում փոքր նավը՝ ծովային ոստիկանության և առափնյա պահպանության անձնակազմի երեք անդամներով, Թուրքիայից անօրինական ներգաղթի դեմ պայքարի կանոնավոր պարեկություն իրականացնելիս նկատել է թուրքական առափնյա պահպանության նավը Կատո Պիրգոս նավահանգստից 11 ծովային մղոն հեռավորության վրա»,- նշում է գործակալությունը:
Թուրքիայի առափնյա պահպանությունը սկսել է հետապնդել կիպրական նավը և կրակ բացել՝ վախեցնելու համար: Գործակալության տվյալներով՝ Թուրքիայի առափնյա պահպանությունը չորս նախազգուշական կրակոց է արձակել:
Կիպրոսի հեռարձակման կորպորացիան՝ RIK-ը, հայտնում է, որ Թուրքիայի առափնյա պահպանությունը շարունակել է հետապնդել կիպրական նավը գրեթե մինչև Կատո Պիրգոս ձկնորսական նավահանգստի մուտքը:
Պաշտպանության նախարարության ներկայացուցիչ Քրիստոս Պիերիսի խոսքով՝ դա բարդ միջադեպ է: Ելույթ ունենալով RIK-ի եթերում՝ նա նշել է, որ «գործը քննվում է, իսկ ազգային գվարդիայի օպերատիվ կենտրոնը տեղեկություններ է հավաքում, որպեսզի իրավասու նախարարության կողմից գործողություններ ձեռնարկվեն»:
Այս մասին մինչ այժմ տեղեկացվել է Արտաքին գործերի նախարարությանը, որն էլ իր հերթին կտեղեկացնի Կիպրոսում ՄԱԿ-ի խաղաղապահ ուժերին՝ UNFICYP-ին:
