«Առաջին լրատվական»-ի հարցերին պատասխանել է ՀՀԿ-ական նախկին պատգամավոր Լեռնիկ Ալեքսանյանը
ՀՀԿ-ն այս խորհրդարանում ներկայացված է լինելու: Ինչպես եք գնահատում, Արթուր Վանեցյանը կարո՞ղ է ընդհանրապես ներկայացնել ՀՀԿ-ն:
Վանեցյանը ներկայացնում է «Պատիվ ունեմ» դաշինքը, ՀՀԿ-ն առանձին ներկայացված չէ: Ես չգիտեմ՝ Ազգային ժողովում այդ դաշինքը կմնա, չի մնա: Դա կապված է նաև իրենց հարաբերություններից: Ես չեմ բացառում, որ ՀՀԿ-ն ու Վանեցյանը խորհրդարանում միասին հանդես չգան: Դա կախված է նրանից, թե խորհրդարանում նույն խմբակցությունում կլինեն, թե ոչ:
Սա ՀՀԿ-ի հաղթանա՞կն էր, թե ոչ, որ ամեն դեպքում մտան խորհրդարան:
Դե իրենք ընդամենը օրենքի ուժով մտան խորհրդարան որպես երրորդ ուժ: Սա ես հաղթանակ չեմ համարում, քանի որ իրենք չհաղթահարեցին 7 տոկոսի շեմը: Կարծում եմ՝ ինչքան ՀՀԿ-ն, այնքան էլ «Հայրենիք» կուսակցությունը դեր ունեցան և երկուսը միասին ստացան այս արդյունքը: Դա միայն ՀՀԿ-ի խնդիրը չէր: Սպասելիքներն ավելի մեծ էին, և ես էլ մտածում էի, որ այդ երկու ուժերը, որոնք տեղերում ունեն կառույցներ, ավելին կարող էին ստանալ: Բայց այն, որ չկարողացան 7 տոկոսը հաղթահարել, դա ինչ-որ բանի մասին խոսում է:
Վանեցյանը երեկ հայտարարեց, որ նախկին երեք նախագահների ժամանակ թալանված գումարների մեծ մասն իր ԱԱԾ տնօրեն եղած ժամանակ վերադարձվել է պետբյուջե: Ինչպե՞ս եք գնահատում այս հայտարարությունը, ստացվում է, որ այդ թալանած ղեկավարներից մեկի հետ էլ ճանապարհ է անցնո՞ւմ:
Ճիշտն ասած, ես Վանեցյանի և ՀՀԿ-ի միացումը ճիշտ չեմ համարում: Սովորաբար 1+1=2, բայց քաղաքականության մեջ լինում են դեպքեր, երբ ասենք, 2+2 հավասար է 1-ի կամ 3-ի: Ես այդ միանալը քաղաքական առումով հենց սկզբից ճիշտ չէի համարում, որովհետև Վանեցյանի կուսակցությունը լրիվ այլ հիմքեր ունի, ՀՀԿ-ն այլ: Ժամանակի առումով էլ Վանեցյանի «Հայրենիքը» բոլոր դեպքերում նոր կուսակցություն է, այնտեղ մարդիկ էլ փորձով զիջում են: Բոլոր դեպքերում այդ միացումը տարօրինակ էր և ՀՀԿ-ի տեսանկյունից, և Վանեցյանի: Համենայնդեպս, դա արհեստական եմ համարում, թե դրա նպատակն ինչ էր, ով ում ինչքանով օգուտ պետք է տար, ես չգիտեմ: Ես էլի եմ ասել, որ այդ դաշինքն արդյունք չէր կարող տալ: Բայց երևի ՀՀԿ-ն փորձել է դեմքը փոխած մտնի խորհրդարան, իսկ «Հայրենիքին» էլ ՀՀԿ-ի փորձն է պետք եղել: Տրամաբանությունը դրան է տանում, բայց դա չէր կարող լավ արդյունք տալ, և ես լավ արդյունք չէի սպասում:
ՀՀԿ-ն շանս ունի՞ վերափոխվելու, նոր դեմքերով հանդես գալու: Ի վերջո, ամբողջ քարոզարշավը Սերժ Սարգսյանը տարավ:
Ես միշտ ասել եմ, որ ՀՀԿ-ն և ընդհանրապես, այն կուսակցությունները, որոնք իշխանություն են լինում, հետո թողնում են իշխանությունը, իրենք քաղաքական նոր ասպարեզ մտնելու համար անպայման պետք է և իրենց դեմքը փոխեն, և բովանդակությունը փոխեն: Պետք է անպայման ընդունեն իրենց անցած սխալները, փորձեն սխալների ուղղում անել, չկրկնել այդ սխալները: Երբ մենք մի քանի հոգով դուրս եկանք Հանրապետականից, մեր հիմնավորումը հենց դա էր, որ կուսակցությունը պետք է անպայման վերափոխվի, ընդունի սխալները և չկրկնի, հանդես գա նոր դեմքերով: Հիմա էլ ՀՀԿ-ն պետք է բոլոր դեպքերում իր գործելակերպը, իր քաղաքական ուղղությունը փոխի: ՀՀԿ-ն երբ 1997 թվականին մտավ ասպարեզ, կոռուպցիայի դեմ պայքարի խնդիրներով մտավ: Նա պետք է շարունակեր այդ ընթացքը և գնալով ինքնամաքրվեր: ՀՀԿ-ն անպայման կարող է մնալ քաղաքական ասպարեզում, եթե իր դեմքը վերափոխի:
«Պատիվ ունեմ» դաշինքը երկար կյանք կունենա՞ խորհրդարանում, թե ինչ-որ պահից կպառակտվի՝ հաշվի առնելով, որ ինչպես ասացիք՝ իրենք տարբեր են իրենց բովանդակությամբ:
Ես չգիտեմ՝ իրենք ոնց կանեն, բայց քաղաքական առումով ես կարծում եմ, որ նրանք չեն կարող մշտապես մնալ միասին: Գուցե հանուն ինչ-որ բանի իրար պետք գալ ու մնալ, բայց քաղաքական առումով իրենք անհամատեղելի են:
