Առաջիկայում դուդուկահար Ջիվան Գասպարյանը հանդես կգա համերգային ծրագրով: Այսօր լրագրողների հետ հանիպման ժամանակ նա ասաց, որ վաղուց Երևանում համերգ չէր կազմակերպել, բայց նշեց, որ այն լինելու է յուրահատուկ: Կլինեն և էստրադային, և ջազային, և դասական կատարումներ: Դուդուկահարը նշեց, որ օրերս ինքը հաշվել է՝ իր կյանքում 20 հազար համերգների է նվագել աշխարհի հայտնի բեմերում:
«Ամենաերջանիկ մարդկանցից եմ, որը կարողացել է դուդուկը ներկայացնել աշխարհում, իսկ այսօր հնարավորություն ունեմ ներկայացնելու Հայաստանում: Ես Երևանը շատ եմ սիրում, սա իմ քաղաքն է, որը օրեցօր գեղեցկանում է»,- ասաց դուդուկահարը` խորհուրդ տալով լինել ավելի բարի, վերջ տալ բամբասանքներին, անտեղի մարդկանց չնեղացնել:
Լրագրողները հետաքրքրվեցին՝ գուցե սա դուդուկահարի հրաժեշտն է բեմին։ Ի պատասխան՝ նա ասաց. «Ոչ թե հրաժեշտ եմ տալիս, ոչ թե ի վիճակի չեմ նվագել, այլ պարզապես որոշել եմ մի քիչ հանգստանալ»: Իսկ իր «ամակը» թողնում է թոռանը:
Դուդուկահարը խոստացավ, որ համերգից բոլորը դուրս կգան բարձր տրամադրությամբ և լավ տպավորություններով: Նա լրագողներին խորհուրդ տվեց. «Դուք ջահելներ եք, ձեզ մատաղ, դուք պետք է շատ զգույշ լինեք ձեր մեծերի նկատմամբ, պետք է ամեն մարդու խելքի չընկնեք։ Սա ձեզ հայրական խրատ ընդունեք, ես ձեզ մատաղ լինեմ: էդքան բամբասանք էս փոքր ժողովրդի մեջ որտեղի՞ց, լավ մտածեք՝ մեղք չե՞նք: Ես ուզում եմ շենքին ու շնորհքին էս փոքր երկիրը կառուցեք, գեղեցկացնեք»:
Ջ. Գասպարյանը անդրադարձավ իր անվան շուրջ բարձրացրած մեծ աղմուկին. «Ասում են՝ իբր Ջիվանը իր տան համար հատուկ փողոց է սարքում: Բերել են՝ բուդկաներ են դրել, մենք էլ ասում ենք՝ հիմա պետությունը որոշում է կայացրել, որ էդ բուդկաները հանեն: Միացել՝ հավաքարար-բանով ասում են՝ Ջիվանն ով ա։ Ես չէի ուզի՝ իմ հասցեին նման բաներ խոսեին»։ Իսկ թե այդ պատմությունը ինչով է ավարտվել՝ ասաց, որ ինքը տեղյակ չէ:
