«Քարոզարշավը կարճ տևեց, բայց կարող ենք ասել, որ հիմնական մասնակիցները տեխնոլոգիապես թերի քարոզարշավ արեցին, բազմաթիվ տեխնոլոգիաներից չօգտվեցին, ինչը անհրաժեշտ էր անել իրենց թեկնածուին լիարժեք ներկայացնելու համար»,-«Առաջին լրատվական»-ի հետ զրույցում նման տեսակետ հայտնեց քաղտեխնոլոգ Արմեն Բադալյանը։
Նրա դիտարկմամբ՝ գործող վարչապետին լրացուցիչ տեխնոլոգիաները չէին օգնի, բայց մյուս թեկնածուների ՝ «Հայաստան» դաշինքի ու «Պատիվ ունեմ»-ի պարագայում այդ տեխնոլոգիաները կարող էին օգնել․«Հավանաբար հաջորդ անգամ դա կիրականացնեն։ Բովանդակային տեսակետից նույնպես չէի ասի, թե խիստ հարուստ քարոզարշավ էր։ Իհարկե յուրաքանչյուրն ըստ իր ընտրազանգվածի ներկայացնում էր համապատասխան բովանդակություն և այնպես չէ, որ բովանդակություն որպես այդպիսին առհասարակ չի եղել։ Բայց կարող եմ ասել, որ բավականաչափ թերի էր քաղաքական-ծրագրային մասը; Դա չի նշանակում, որ ընտրությունների ժամանակ ընտրողները հատուկ սպասում են ծրագրերին ու ըստ այդ ծրագրերի քվեարկում, բայց այնուամենայնիվ, քանի որ ընտրությունների ժամանակ պետք է քաղաքական ասելիքը լավ ներկայացնես, դու դա պետք է դա անես բոլոր ոլորտներում՝ այդ թվում նաև ծրագրային ոլորտներում։ Դա ևս տեղի չունեցավ, կամ եղավ, բայց թերի»։
Քաղտեխնոլոգի խոսքերով՝ դիտարկումները ցույց են տալիս, որ կողմնորոշվելու հետ կապված քարոզարշավի ընթացքում եղել են որոշ փոփոխություններ․«Բայց արդյոք չկողմնորոշված ընտրազանգվածը ամբողջովին է կողմնորոշվել, դա արդեն ցույց կտա քվեարկությունը»։
Մեր զրուցակիցը նշեց՝ քաղաքական ուժերը հիմնականում հենվեցին Հայաստանում ստեղծված իրավիճակի վրա․ «Սա ոչ թե սովորական արտահերթ ընտրություններ են, ինչպես օրինակ Իտալիայում, Շվեդիայում, եվրոպական այլ երկրներում, սրանք ընտրություններ են, որից վեց ամիս առաջ Հայաստանը կապիտուլյացիոն պայմանագիր է կնքել, Հայաստանն էլ 5000 զոհ է տվել։ Ելնելով ստեղծված իրավիճակից ու կարճ ժամկետից, այդքան մեծ ուշադրություն չդարձվեց ծրագրային, այսինքն՝ գաղափարական հատվածին։ Դա թերություն էր։ Այո, ժամանակը շատ չէր, բայց քաղաքական ուժը պարտավոր էր դա լիարժեք ներկայացնել, թեկուզ եթե դա հետաքրքրում է ընդամենը հինգ տոկոսին։ Օբյեկտիվ պայմանները հասկանալի էր, բայց արձանագրենք, որ թերություն էր»։
Արմեն Բադալյանը այս պահի դրությամբ չի կարծում, թե որևէ ուժ կհավաքի 50+1 տոկոս ձայն․ «Ես նշել եմ, որ 4 ուժ է մուտք գործելու խորհրդարան, բայց քանի որ չկողմնորոշված ընտրազանգվածի թիվը բավականին բարձր է մնում, դրա նույնիսկ մեկ կամ երկու տոկոսի կողմնորոշվելը կարող է օգնել, որ հինգերորդ կամ վեցերորդ տեղում գտնվող քաղաքական ուժին մտնի խորհրդարան։ Դրա համար այդ 4 ուժից բացի, հնարավոր է, որ չկողմնորոշված ընտրազանգվածի շնորհիվ ևս մեկ կամ երկու ուժ մտնի խորհրդարան։ Կան ուժեր, որոնք ունեն երկուսուկես, երեք կամ չորս տոկոս ձայն և պատկերացրեք եթե չկողմնորոշված ընտրազանգվածի կեսը ձայն տա այդ կուսակցությանը, նա կստանա 5 տոկոս ու ավել և մուտք գործել խորհրդարան։ Այդ սցենարը միանգամայն հնարավոր է»։
