Իսրայելական Maariv թերթի փոխանցմամբ՝ Իսրայելը Թուրքիային առաջարկում է կրկնապատկել նախորդ տարի տեղի ունեցած «Մավի Մարմարա»-ի միջադեպի ժամանակ զոհվածների հարազատներին տրվելիք փոխհատուցումը։
Իսրայելական ղեկավարությունը թուրքական կառավարությանն առաջարկել է զոհվածների ընտանիքներից յուրաքանչյուրին վճարել 100.000 դոլար։ Դրա փոխարեն Թուրքիան պետք է հրաժարվի ներողություն խնդրելու վերաբերյալ իր պահանջից։
Maariv-ի թղթակից Էլի Բարդենշտեյնը գրում է, որ իրենց տվյալներով՝ մի քանի օր ԱՄՆ նախագահ Բարաք Օբաման խոսել է Իսրայելի վարչապետ Բենյամին Նեթանյահուի հետ։ Ամերիկյան առաջնորդն իսրայելական կառավարության ղեկավարից պահանջել է կարգավորել թուրքական ղեկավարության հետ հարաբերությունները՝ նախքան Պալմերի հանձնաժողովի կողմից «Մավի Մարմարա»-ի միջադեպի հետաքննությանն առնչվող զեկույցի հրապարակումը։
Հիշեցնենք, որ 2010 թվականի մայիսի 31-ի գիշերը Իսրայելի ռազմածովային ուժերը հարձակում գործեցին «Մեր ուղեգիծը Պաղեստինն է, իսկ բեռը՝ մարդասիրական օգնություն» կարգախոսով, վեց նավից բաղկացած «Ազատության նավատորմի» վրա, որը 10 տոննա հումանիտար օգնություն էր տանում Գազա:
Հարձակման հետևանքով 16 մարդ սպանվեց, մոտ 30-ը՝ վիրավորվեց: Զոհվածների թվում էին Թուրքիայի 9 պաղեստինամետ քաղաքացիներ: Իսրայելը վստահեցնում էր, որ 6 նավերով Գազայի հատված ուղևորվող շուրջ 700 ակտիվիստները նաև զենք են կրել:
Թուրքիայի արտգործնախարար Ահմեդ Դավութօղլուն դա որակեց որպես «թուրքական սեպտեմբերի 11»` միջազգային հանրության ուշադրությունը հրավիրելով այն բանի վրա, որ իրենց քաղաքացիները սպանվել են այլ երկրի կանոնավոր բանակի կողմից, իսկ Թուրքիայի վարչապետ Էրդողանը հայտարարեց, որ Իսրայելը զբաղվում է «ծովահենությամբ»։
Դրանից հետո թուրքական կողմն Իսրայելից շարունակ պահանջում է ներողություն խնդրել և փոխհատուցում վճարել տուժածների ընտանիքներին, ինչը, ըստ իսրայելական կողմի, նշանակում էր հանձնվել ահաբեկչությանը: