Ազգային ժողովի հունիսի 16-ի նիստը չի կայացել՝ քվորում չլինելու պատճառով:
Ժամը 10:00-ին համապատասխան թվով պատգամավորներ չէին գրանցվել: «ԱԺ կանոնակարգ» սահմանադրական օրենքի 51-րդ հոդվածի 4-րդ մասի համաձայն՝ գրանցումը շարունակվում է մինչեւ անհրաժեշտ թվով պատգամավորների գրանցվելը, բայց ոչ ավելի, քան 4 ժամ: Այդ ընթացքում եւս անհրաժեշտ թվով պատգամավորներ չեն գրանցվել:
ԱԺ պաշտոնական կայքը տեղեկացնում է՝ ԱԺ փոխնախագահ Լենա Նազարյանը հայտարարել է, որ գրանցվել է 17 պատգամավոր, ինչը նիստի իրավազորության համար բավարար չէ:
Խորհրդարանում ներկայացված քաղաքական ուժերը հիմնականում նախընտրական քարոզարշավ են իրականացնում:
Հայաստանում հունիսի 7-ին մեկնարկել է արտահերթ խորհրդարանական ընտրությունների քարոզարշավը, այն կտևի մինչև հունիսի 18-ը: Ընտրություններն անցկացվելու են հունիսի 20-ին:
