Երևանում թափառող շների դեմ պայքարը իրականացվում է մրցույթի միջոցով ընտրված ընկերության կողմից։ Այդ մրցույթում արդեն վեցերոդ տարին է՝ հաղթող է ճանաչվել «Յունիգրաֆ-իքս» կազմակերպությունը, որն իր ծրագիրը իրականացնելու համար գումար (տարեկան 0.5 միլիոն ԱՄՆ դոլար) է ստանում պետբյուջեից։ Երևանում 2006-2010 թթ. և 2011 թ. հունվար-փետրվար ամիսներին, այսինքն՝ 5 տարի 2 ամսում, կատարվել է գործողություն 121.027 շան նկատմամբ, որոնցից 36.127-ը ստերջացվել է, 1.374-ը քնեցվել, 83.526-ը «վնասազերծվել», այսինքն՝ սատկացվել։ Այս թվերը ներկայացնում է ընկերության պաշտոնական կայքը (www.animalscity.am)։
Ինչպես «Առաջին լրատվական»-ի հետ զրույցում հայտնում է Pro Paws ՀԿ-ի նախագահ Նարե Արամյանը, հրապարակված այս թվերը անհեթեթ են և հավանական չեն Երևանի պես փոքր քաղաքի դեպքում։
«Այդ քանակության շների նկատմամբ գործողություն չէր կարող կատարվել, դա անհնար է, քանի որ ժամանակահատվածը կարճ է, դիակների թաղման համար չկա համապատասխան չափանիշներով տարածք, բնութագրիչների համաձայն՝ դիրք, կլիմա, սնունդ, բնակչության խտություն, տիրույթում այդքան շուն չի կարող լինել»,- ասում է Նարե Արամյանը։
Նման թվեր հրապարակելով, իբր մեծ աշխատանքը ներկայացնելով՝ ընկերությունը հավակնում է հերթական անգամ շահել մրցույթում և նորից պետբյուջեից գումարներ ստանալ։
«Յունիգրաֆ-իքս» ընկերության գործունեության մեջ կա ևս մեկ կարևոր սխալ. խնդիրն այն է, որ, ինչպես վաղուց ապացուցված է, շների սպանդը չի լուծում խնդիրը։ Բոլոր քաղաքակիրթ երկրներում կատարվում է միայն շների ստերջացում։
Իսկ «Յունիգրաֆ-իքս»-ը հայտարարում է, թե 5 տարի 2 ամսում սպանել է 83.526 կենդանիներին։
«Հայաստանում չկա քնեցման համար անհրաժեշտ համապատասխան դեղորայք, իսկ այն դեղորայքը, որից, իրենց իսկ խոսքերով, օգտվում է «Յունիգրաֆ-Իքս»-ը՝ լիդոկայինը, միայն տանջամահ է անում կենդանիներին»,- ասում է Նարե Արամյանը։ Բացի այդ, ընկերությունը նախապատվությունը տալիս է ոչնչացման մեթոդին, քանի որ դա կատաղություն է առաջացնում շների մոտ և «հիմնավորում» թափառող շների ոչնչացման մեթոդը։
Pro Paws-ը ռազմավարական ծրագրեր է իրականացնում։ Ինչպես հայտնում է ՀԿ նախագահը՝ Pro Paws-ը դիմել է վերջին երեք քաղաքապետերին, սակայն որևէ փոփոխություն չի գրանցվել։ Այժմ ՀԿ-ն պայքարում է, որպեսզի ՀՀ ԱԺ-ն ընդունի Ընտանի կենդանիների պաշտպանության եվրոպական կոնվենցիան։ «Կարևոր չէ, թե որ կամ ում ընկերությունն է այս ամենը իրականացնում, կարևորն այն է, որ վատ է դա կենդանիների համար։ Ահա թե ինչու մենք ուզում ենք հասնել օրենքի միջոցով հարցի լուծմանը»,- ասում է նա։
