Ռուսաստանը «թիվ մեկ սպառնալիք է Բրիտանիայի համար»։ Корреспондент պարբերականի փոխանցմամբ՝ The Telegraph-ին տված հարցազրույցում նման հայտարարություն է արել Մեծ Բրիտանիայի պաշտպանության նախարար Բեն Ուոլեսը:
Նրա խոսքերով՝ ռուսական սուզանավերը շրջում են Մեծ Բրիտանիայի ափերի շուրջ, իսկ ռուսական նավերը «պարբերաբար այցելում են» բրիտանական ջրեր: Այսպես, Ուոլեսի խոսքերով՝ 2020 թվականին Բրիտանիայի ափերին նկատել են 26 ռուսական նավ և մեկ սուզանավ, իսկ 2013 թվականից ի վեր գրանցվել է 150 նման միջադեպ:
Բրիտանիայի պաշտպանության նախարարը հայտնել է, որ որպես կանոն, ռուսական նավերը մտնում են Լա Մանշ կամ Հյուսիսային ծով, բայց 2020-ի վերջին, գուցե, առաջին անգամ, ռուսական սուզանավ է նկատվել Իռլանդական ծովում։
Ըստ Բեն Ուոլեսի՝ բրիտանացիներն արդեն փորձել են տարբեր մեթոդներ իրավիճակի ապաէսկալացման հասնելու համար, սակայն այս պահին դժվար է կանխատեսել իրավիճակի հետագա զարգացումը։ Մեծ Բրիտանիայի պաշտպանության նախարարը հիշեցրել է, որ խոսքը Սոլսբերիում տեղի ունեցած միջադեպի մասին է։
Հիշեցնենք՝ 2018-ի մարտին Մեծ Բրիտանիայի Սոլսբերի քաղաքում թունավորվել էին ռուս նախկին հետախույզ Սերգեյ Սկրիպալը և նրա դուստր Յուլյան: Հետաքննության համաձայն՝ Սկրիպալները թունավորվել են «Նովիչոկ» նյարդապարալիտիկ նյութով։ Լոնդոնը թունավորման մեջ մեղադրում է Մոսկվային։ Ռուսական կողմը հերքում է միջադեպին իր առնչությունը: