Բրիտանացի արքայազն Հարրին ամերիկացի հեռուստահաղորդավարուհի Օփրա Ուինֆրիին պատմել է ալկոհոլի հետ կապված խնդիրների մասին, որոնք առաջացել էին մոր՝ արքայադուստր Դիանայի մահից հետո ցավը մեղմելու ցանկությունից:
«Ուրբաթ կամ շաբաթ երեկոյան ես կարող էի խմել այնքան, որքան խմում են մարդիկ մեկ շաբաթվա ընթացքում: Ես դա անում էի ոչ թե այն պատճառով, որ ինձ դուր էր գալիս, այլ որովհետև փորձում էի ցավը թուլացնել», – խոստովանել է Մեծ Բրիտանիայի թագուհու թոռը:
Նրա խոսքով ՝ ընտանիքը չէր ցանկանում խոսել Դիանայի մահվան մասին, և ինքը ստիպված էր «լուռ տառապել»:
Հարազատները հավատում էին, որ արքայազնն ինքնուրույն կհաղթահարի հոգեկան տառապանքները, բայց խնդիրները սրվել են, և ամենավատը 28-32 տարեկան ժամանակահատվածն էր: Այդ ընթացքում արքայազնը պայքարել է խուճապի նոպաների և ուժեղ անհանգստության դեմ:
Նույն զրույցի ընթացքում արքայազն Հարրին խոստովանել է, որ իր կյանքի շրջադարձային պահը հանդիպումն էր իր ապագա կնոջ ՝ դերասանուհի Մեգան Մարքլի հետ 2016 թվականին: Հարրիին օգնել է նաև հոգեթերապիան։
Բացի դրանից, Հարրին ասել է, որ թագավորական ընտանիքի անդամ լինելուց հրաժարվելու և ԱՄՆ տեղափոխվելու հիմնական պատճառներից մեկը հարազատների ճնշումն էր:
Արքայադուստր Դիանան մահացել է 1997 թվականին, Փարիզում տեղի ունեցած դժբախտ պատահարի հետևանքով: Նրա կրտսեր որդին ՝ Հարրին, այդ ժամանակ 12 տարեկան էր:
