Վարչապետի պաշտոնակատար Նիկոլ Փաշինյանը կառավարության նիստում վերստին անդրադարձել է Հայաստանի քաղաքական դաշտում ադրբեջանական քարոզչական պայքարի գործակալների առկայության մասին, որոնք, ըստ Փաշինյանի, այստեղ տարածում են ադրբեջանական քարոզչական դրույթներ և սպասարկում Ադրբեջանի շահը, տորպեդահարելով Հայաստանի դիվանագիտական աշխատանքը: «Ժամանակակից աշխարհում տեղեկատվական պայքարը երբեմն ավեկի կարևոր է լինում, քան բուն դաշտում տեղի ուենցողը, և կրկին ուզում եմ ասել, չեմ խուսափի այդ բառից՝ Ադրբեջանը Հայաստանի քաղաքական վերնախավում ունի տեղեկատվական պայքարի գործակալներ, ընդ որում, այդ մարդկանց գործունեությունը նոր չի և էդ մարդիկ նախ 2020-ին Ադրբեջանին հրավիրում էին հարձակվել Հայաստանի վրա՝ հրապարակային, բաց, էդ մարդիկ վերջերս ԱԺ-ում, ամենատարբեր տեղերում ցույց էին տալիս այն արահետները, որոնցով կարելի է հնարավորինս ապահով հատել ՀՀ սահմանները, հիմա այդ մարդիկ Ադրբեջանին աջակցում են, որ այն դիվանագիտական աշխատանքը, որ անում ենք, դրանք իրագործելուց խուսափելու հնարավորություն ունենա»,- հայտարարել է Նիկոլ Փաշինյանը: Նա խոսել է մի փաստաթղթի մասին, որն ըստ Փաշինյանի ստորագրելու է, քանի որ այն 100 տոկոսով համապատասխանում է Հայաստանի շահին:
Վարչապետի ԺՊ-ի խոսքով, նախօրեին տարածված տեղեկությունը, թե փաստաթուղթը դավադրություն է Հայաստանի դեմ, հենց ադրբեջանական տեղեկատվական գործակալության դրսևորում է, քանի որ հակառակ դեպքում փաստաթղթի մասին «արտահոսքը» տեղի չէր ունենա դրա բովանդակության մեծ մասը ծածկած: Ըստ Փաշինյանի, Ադրբեջանը փորձում է այդ արտահոսքերով Հայաստանում ստեղծել իրավիճակ, որը նրան թույլ կտա խուսանավել փաստաթղթից և դրանում ամրագրված պարտավորություններից: Այստեղ առաջանում է երկու հարց: Նախ, հատկանշական է, որ նախօրեին տեղի ունեցած Պուտին-Փաշինյան զրույցից հետո Նիկոլ Փաշինյանը խոսում է փաստաթղթի մասին, և ընդհանրապես Հայաստանում տարածվում է այդ թեման: Նկատենք, որ Պուտինը խոսել էր նաև Ալիևի հետ, ըստ այդմ հնարավոր է եզրակացնել, որ այդ երկուստեք խոսակցությունները վերաբերել են հենց պատրաստվող փաստաթղթին: Այստեղ մյուս հանգամանքը այն է, որ Փաշինյանի և Ալիևի հետ զրույցները տեղի են ունեցել Ռեյկյավիկում Լավրով-Բլինկեն հանդիպման ֆոնին, որը ի թիվս շատ հարցերի քննարկել է նաև հայ-ադրբեջանական խնդիրը, և որը՝ սա նույնպես առանցքային է, ըստ էության Բայդեն-Պուտին հանդիպման նախապատրաստության փուլից է: Ի դեպ այդ ֆոնին էլ հատկանշական է նախօրեին Չավուշողլու-Բայրամով հեռախոսազրույցը: Ի՞նչ փաստաթուղթ է պատրաստվում, որը Նիկոլ Փաշինյանի խոսքով 100 տոկոս համապատասխանում է Հայաստանի շահին և որը Բաքուն փորձում է տապալել Հայաստանում իր տեղեկատվական գործակալների միջոցով: Մյուս հարցն այն է, թե որքա՞ն է Հայաստանի կառավարության ղեկավարը խոսելու այդպիսի գործակալների առկայության մասին, առանց դրանց չեզոքացնելու կոշտ գործուն քաղաքականության: Որովհետև, եթե վարչապետի մակարդակով հայտարարվում է այդպիսի գործակալական դաշտի առկայության մասին, ապա դրան պետք է հետևի պետության համարժեք գործողությունը՝ դաշտը չեզոքացնելու համար: Եթե ոչ, ապա թերևս պետք է դադարել խոսել այդ մասին, քանի որ առանց կոնկրետ քայլերի թվում է, որ այդ մասին խոսակցությունն էլ իր հերթին քաղաքական ալիբի է քաղաքական մեծամասնության համար՝ սեփական գործողությունների անարդյունավետությունը «դուրս գրելու» համար:
Լուսանկարը՝ Armeniasputnik-ի
