Ըստ Ֆեյսբուքում տարածված տեղեկությունների` այսօր Տերյան փողոցում ընդհարում է տեղի ունեցել ոստիկանների և ՀԱԿ ակտիվիստների միջև: Վերջիններից 7-ը ներկայումս գտնվում են Կենտրոնի ոստիկանությունում: Չճշտված լուրեր կան, որ նրանց այնտեղ ծեծի են ենթարկում, իսկ բակում արդեն սկսել են մարդիկ հավաքվել:
Ֆեյսբուքի բազմաթիվ օգտատերեր քաղաքացիներին կոչ են անում հավաքվել կենտրոնի ոստիկանության մոտ:
«Առաջին լրատվական»-ի թղթակիցը տեղեկացրեց, որ րոպեներ առաջ կենտրոնի ոստիկանության մոտ հավաքված բազմությանը միացան Կոնգրեսի ներկայացուցիչներ Լևոն Զուրաբյանը, Դավիթ Շահնազարյանը, Արման Մուսինյանը, Նիկոլ Փաշինյանը, Վահագն Խաչատրյանը և այլոք:
Արդեն հայտնի է բերման ենթարկվածների անունները` Քիրամիջյան Դավիթ, Առաքելյան Տիգրան, Գևորգյան Վահագն, Գևորգյան Արեգ, Մուրադյան Սահակ, Կարապետյան Արտակ, Գևորգյան Սարգիս:
Մեր թղթակիցը տեղեկացնում է նաև, որ բերման ենթարկված ՀԱԿ ակտիվիստների փաստաբաններին և շտապ օգնության բժիշկներին երկար ժամանակ չէին թողնում մտնել ոստիկանական բաժանմունք: Որոշ ժամանակ անց փաստաբաններին թողել են, իսկ բժիշկները դեռ դրսում են:
