Կորոնավիրուսային համաճարակի երկրորդ տարին կարող է հանգեցնել ավելի շատ մահերի, քան առաջինը: Այս մասին այսօր Ժնևում կայացած ճեպազրույցում հայտարարել է Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադանոմ Գեբրեյեսուսը:
«COVID-19-ն արդեն ավելի քան 3,3 միլիոն մահվան պատճառ է դարձել, և մենք համաճարակի երկրորդ տարում այն ուղղու վրա ենք, երբ համաճարակի երկրորդ տարին կարող է դառնալ ավելի մահացու, քան առաջինը»,- ասել է նա:
ԱՀԿ ղեկավարը կոչ է արել համաշխարհային հանրությանը համաճարակի դեմ պայքարում օգտագործել «միջոցառումների համադրություն» ՝ պատվաստումներ և հանրային առողջության ոլորտի այլ քայլեր: Նա կոչ է արել մեծ քանակությամբ կորոնավիրուսային պատվաստանյութեր ունեցող պետություններին COVAX մեխանիզմի միջոցով կիսվել նրանց հետ, ովքեր չունեն դրանք: Նա COVAX-ը համարել է «պատվաստանյութերի իրավահավասար բաշխման ամենաարագ ձևը»:
COVAX-ը միջազգային մեխանիզմ է, որը ԱՀԿ-ն գործարկել է պատվաստումների և իմունիզացիայի գլոբալ դաշինքի և Համաճարակային պատրաստվածության նորարարության կոալիցիայի հետ համատեղ: Այն աջակցում է արտադրական օբյեկտների ստեղծմանը և իրականացնում է գնումներ, երբ բարձր եկամուտ ունեցող երկրները վճարում են պակաս հարուստ երկրների պատվաստանյութեր ձեռք բերելու ծախսերը: Ծրագրի համաձայն՝ 2021 թվականի ավարտին պետք է 2 միլիարդ դեղաչափ պատվաստանյութ արտադրվի և հավասարաչափ բաշխվի ամբողջ աշխարհում:
