Սյունիքում մի քանի օր է Ադրբեջանի զինված ուժերը 3,5 կմ մտել են Հայաստանի ինքնիշխան տարածք, սակայն հայաստանյան քաղաքական ուժերի ու նրանց որոշ ներկայացուցիչների հայտարարություններից տպավորություն է ստեղծվում, որ նրանք այս զարգացումների մեջ ոչ թե վտանգ են տեսնում, այլ փորձում են ստեղծված իրավիճակից առավելագույն դիվիդենտներ շահել:
Սյունիքում ստեղծված իրավիճակի և դրա վերաբերյալ արձագանքների շուրջ «Առաջին լրատվական»-ը զրուցել է Ձայն լիբերթար պահպանողական կուսակցության կառավարման խորհրդի անդամ Արեգ Քոչինյանի հետ:
«Իրավիճակը, ինչպես վարչապետն ասաց, մերձճգնաժամային է, եթե ոչ ճգնաժամային: Ըստ էության, մենք ունենք իրողություն, երբ հակառակորդի ստորաբաժանումները մտել են Հայաստանի ինքնիշխան տարածք և այս պահի դրությամբ դեռ այնտեղից դուրս չեն եկել:
Ինչ վերաբերում է որոշ ուժերի ու գործիչների արձագանքներին, Արեգ Քոչինյանը դրանք անպատեհ որակեց. «Ես կարծում եմ, որ եթե այդ անպատեհ արձագանքի մեջ կա օրենքի խախտում, ես պահանջում են, որ իրավապահ մարմինները դրանով զբաղվեն, եթե նման խախտում չկա, ապա ընդամենը ես հասարակությանը և լրագրողական հանրությանը կոչ կանեմ հնարավորինս դրանց կողքով անցնել, ուշադրություն չդարձնել: Որովհետև այդ դիսկուրսը չի ելնում ընդհանրապես Հայաստանի պետական շահերից: Այդ խառնակչությունը, այդ պանիկան, այդ ոչ պրոֆեսիոնալ մեկնաբանությունները, ժամանակից առաջ ընկնելն ու ինչ-որ որակումներ տալը, «ամեն ինչ կորած է» գոռալը դա չի բխում Հայաստանի պետական շահերից»,-ասաց նա:
Հարցին, թե ինչո՞ւ Լավրովի այցից հետո տեղի ունեցան նման զարգացումներ՝ հաշվի առնելով, որ նա տարածաշրջան այցելության ժամանակ խոսում էր սահմանների ճշգրտման ու քարտեզների մասին, Արեգ Քոչինյանն արձագանքեց. «Ընդհանրապես մեր տարածաշրջանում Ռուսաստանի ցանկացած գործողությունը կամ գործողության բացակայությունը, այսպես թե այնպես, ազդում է հակամարտության կողմ հանդիսացող երկրների գործունեության և արարքների վրա: Դա անխուսափելի է և էլ ավելի անխուսափելի դարձավ, երբ Ռուսաստանն այստեղ ունեցավ խաղաղապահի ստորաբաժանումներ:
Հիմա ես կդժվարանամ պատասխանել, թե Ադրբեջանի կողմից այս դիվերսիան Լավրովի այցի պատասխա՞նն էր, թե՞ նրա այցի շարունակությունը, որովհետև չեմ տիրապետում ամբողջական տեղեկատվությանը, թե ինչ է քննարկվել, ինչ է որոշվել թե Երևանում, թե Բաքվում: Բայց ինձ համար ուշագրավ է փաստը, որ խաղաղապահի ստորաբաժանման ղեկավարն է փոխվում ռուսական կողմի որոշմամբ: Սա վկայում է, որ Ռուսաստանն այնքան էլ գոհ չէ այստեղ իր խաղաղապահ կոնտինգենտի վարած օպերացիայից»:
