Թուրքիայի բարձրաստիճան ղեկավարությունը շարունակում է Պաղեստինում իսրայելցի ուժայինների գործողությունները դատապարտող հայտարարություններ անել՝ հետզհետե կոշտացնելով հռետորաբանությունը:
Ինչպես տեղեկացնում է Еrmenihaber-ը՝ Թուրքիայի մեջլիսի նախագահը Մուսթաֆա Շենթոփը Գազայի հատվածում հրեական օդուժի կողմից գիշերը իրականացված ավիահարվածների վերաբերյալ կատարած գրառման մեջ Իսրայելը որակել է որպես ահաբեկչական պետություն:
«Օկուպանտ Իսրայելն ամբողջական իմաստով պետական ահաբեկչություն է իրականացնում: Իսրայելի ռազմական ինքնաթիռների կողմից Հյուսիսային Գազային հասցված ավիահարվածների հետևանքով 3 երեխա է զոհվել:
ՄԱԿ-ն ու ամբողջ աշխարհը կրկին լուռ են: Եթե նույնիսկ բոլորը լռեն, Թուրքիան երբեք չի լռելու»,- գրել է Շենթոփը:
Նշենք, որ իսրայելական կործանիչների կողմից Գազայում հասցված ավիահարվածների հետևանքով, ըստ վերջին տվյալների, սպանվել է 24 քաղաքացիական անձ, այդ թվում՝ 9 երեխա: Հաղորդվում է, որ ՀԱՄԱՍ պաղեստինյան զինված կազմակերպության կողմից էլ մի քանի հրթիռ է արձակվել Իսրայելի ուղղությամբ:
