Վերլուծաբան Հակոբ Բադալյանը ֆեյսբուքյան իր էջում գրել է․
Պարզապես, հիշեցի:
2015 թվականին Հայաստանը կայացրեց Բաքվում, այսպես ասած՝ եվրոպական օլիմպիադա կոչված մառազմին մասնակցելու որոշում: Ալիեւը այդ մառազմ գաղափարի առաջին իրականացնողն էր, այլ կերպ ասած՝ փող տվողը: Հասկանալի է, ոչ թե օլիմպիական գաղափարներին հավատարմության, այլ ընդամենը իր եւ Ադրբեջանի միջազգային PR-ի համար, նաեւ իհարկե զանազան սխեմաների հետ կապվելու:
Թե ինչպիսի իրավիճակ էր 2015 թվականին սահմանին, թերեւս թարմ է բոլորի հիշողության մեջ: 2014 թվականի նոյեմբերին Ալիեւը այսպես ասած դիվերսիոն պատերազմը հրահրեց Տավուշում, 2014-ի նոյեմբերին խոցեց ուսումնավարժական թռիչք իրականացնող հայկական ռազմական ուղղաթիռը եւ անգամ թույլ չէր տալիս դուրս բերել զոհերի դիերը: Իսկ սահմանային տարաբնույթ միջադեպերն ու դիվերսիոն գրոհները, որոնց հետեւանքով գրեթե ամեն ամիս մենք ունենում էինք զոհեր, դարձել էին սովորական բան:
Ահա այդ պայմաններում, Հայաստանը կայացնում է 2015 թվականի ամռանը Բաքվում ըստ էության Ալիեւի PR-ին մասնակցելու որոշում: Ընդ որում, որոշման կայացումը ֆորմալ առումով թողնվեց Օլիմպիական կոմիտեին, կոմիտեն էլ իր հերթին իբրեւ թե ազգային ֆեդերացիաներին: Հիմա բոլորը դարձել են թունդ հայրենասերներ:
Այն ժամանակ գրում էի, դուք հասկանում ե՞ք, ինչ եք անում, ինչու՞ եք անում, ինչու՞ եք մասնակցում Ալիեւի միջազգային PR-ին: Իսկ երկրում հիմնականում լռություն էր:
Հետո, այդ օլիմպիադայից մեկ ամիս անց, 2015-ի սեպտեմբերին, Ալիեւը գրեթե մի ամբողջ ամիս ինտենսիվ հրթիռակոծում ու արկակոծում էր Տավուշը, ընդհուպ Նոյեմբերյան քաղաքը, որտեղ ունեցանք նույնիսկ քաղաքացիական զոհ: