Ֆիլիպինների Լուսոն կղզում հնէաբանները հայտնաբերել են նախկինում անհայտ հսկա բարակապոչ երկու առնետների մնացորդներ: Գիտնականները կարծում են, որ դրանք ամբողջությամբ ոչնչացվել են արշիպելագի առաջին բնակիչների կողմից 2-4 հազար տարի առաջ: Ուսումնասիրության արդյունքները հրապարակվել են Journal of Mammalogy-ում: Այս մասին գրում է ՏԱՍՍ-ը։
«Այս երկու տեսակներն էլ անհետացել են մոտ երկու հազարամյակ առաջ և, ըստ երեւույթին, ոչ պատահական: Միևնույն ժամանակահատվածում, տեղանքի մշակութային շերտերում հայտնվել են խեցեղենի բեկորներ, նեոլիթյան գործիքներ և ընտելացված խոզերի և շների ոսկորներ: Հաստատ չենք կարող ասել, բայց թվում է, որ կղզու առաջին բնակիչները մասնակցել են այս կրծողների ոչնչացմանը»,- ասել է Ֆիլիպինների համալսարանի պրոֆեսոր Արմանդ Միյարեսը:
Այսպես կոչված բարակապոչ առնետները (Phloeomys) մկների ընտանիքի ամենամեծ ներկայացուցիչներն են Եվրասիայում: Այս կրծողների ժամանակակից տեսակների ներկայացուցիչները հասնում են 2-2,5 կգ և 75 սմ երկարության: Նրանք ապրում են միայն Լուսոն կղզում: Բարակապոչ առնետները բրնձի դաշտերի հիմնական վնասատուներից են, այդ իսկ պատճառով ֆերմերները ակտիվորեն պայքարում են դրանց դեմ: Կղզու որոշ նահանգներում մարդիկ ամբողջությամբ ոչնչացրել են բարակապոչ առնետներին: Բացի դրանից, լեռների բնակիչները որսում են այս կրծողներին մսի համար: Միյարեսը և նրա գործընկերները ենթադրում են, որ առնետների մի քանի տեսակներ արդեն անհետացել են կղզուց՝ նախկինում կատարված նման որսի պատճառով:
Նրանք ուսումնասիրել են Կալաո քարանձավային համալիրը, որտեղ վերջերս հայտնաբերվել էին հին մարդկանց (Homo luzonensis) ոսկորներ: Սկզբնապես նրանք հույս ունեին գտնել այս տեսակի գոյության նոր հետքեր, բայց փոխարենը հայտնաբերեցին առնետների նախկինում անհայտ երեք տեսակների բազմաթիվ ատամներ և ոսկորների բեկորներ: Պարզվել է, որ այդ ոսկորները նախկինում էլի են հայտնաբերվել. գիտնականները դրանք գտել են Ֆիլիպինների թանգարանների պահեստներում:
Այլ պեղումները ցույց են տալիս, որ մարդկանց՝ կղզի հասնելուց հետո հարթավայրում ապրող շատ այլ կենդանիների տեսակների բազմազանությունը կտրուկ նվազել է: Գիտնականները հույս ունեն, որ հետագայում ուսումնասիրելով այդ կրծողների ճակատագիրը՝ կարելի է կանխել բարակապոչ առնետների ժամանակակից տեսակների ոչնչացումը:
