Արցախի նախագահ Արայիկ Հարությունյանի համար պատերազմի հետևանքները պարզ են եղել արդեն հոկտեմբերի սկզբին, բայց հայաստանյան քաղաքական ուժերն ընդհանուր հայտարարի չեն եկել: Այս մասին Հարությունյանը հայտարարել է ԱՀ քաղաքաշինության նախարարության աշխատանքային կոլեկտիվի և շինարարական կազմակերպությունների ղեկավարների հետ հանդիպման ժամանակ:
«1994-ի մայիսի 12-ի զինադադարից հետո մեր ռազմաքաղաքական ղեկավարությունը ճիշտ դասեր չի քաղել աշխարհի օրինակներից եւ ունենալով առավելություն բանակցային գործընթացում ավելի նպաստավոր լուծումներ չի կարողացել ունենալ: Չի ձեւավորվում քաղաքական կոնսենսուս կամ միասնական կարծիք՝ ընդդիմադիր, իշխանամետ, իշխանություն, եւ կարծես թե պատերազմը կանգնեցնելը հոկտեմբերին համարում էին դավաճանություն»,-ասել է Հարությունյանը՝ անդրադառնալով 44-օրյա պատերազմին:
Նախագահը ընդգծել է, որ հակառակորդի կողմից պատերազմին մասնակցում էր Թուրքիան: Այսօր էլ թուրքական պաշտոնյաները հայտարարում են, որ Ադրբեջանի հետ միասին իրենց հաջողվել է լուծել պատմական արդարությունը:
Ըստ նախագահի, միայն 7 հազար ահաբեկիչ վարձկան Սիրիայից մասնակցում էր արցախյան երկրորդ պատերազմին:
«Մեր ամենամեծ սխալը եղել է այն, որ 1992 թվականի հունիսի 13-ից, երբ հայաթափվեց Շահումյանը, հետո Մարտակերտը, Հադրութի, Մարտունու, Ասկերանի որոշ գյուղեր, մենք տեր չենք կանգնել եւ ավելի քան 50 հազար հայ բնակչություն թողել են Արցախը՝ ունենալով հնարավորություն տեղավորելու:Սա պատճառներից մեկն է, քանի որ Արցախում բնակչությունը պետք է լիներ ոչ թե 45 հազար, այլ ավելի քան 200 հազար: Շահումյանցիների 10 տոկոսին էլ տեր չենք կանգնել եւ այդ մարդիկ գնացել են»,-նշել է Հարությունյանը՝ հավելելով, որ Հայաստանի եւ Արցախի ապագան տեսնում է նոր ռազմաքաղաքական ավելի խորը համագործակցության շրջանակներում եւ Ռուսաստանի հետ միասին կարողանանք դիմակայել այս ստեղծված իրավիճակին:
«Թուրքիան չի պատրաստվում լքել տարածքը: Արցախը կշարունակի քաղաքական պայքարը Ադրբեջանի կողմից օկուպացված տարածքների համար, գոնե ԼՂԻՄ սահմաններում».-եզրափակել է ԱՀ նախագահը:
մանրամասները՝ Արցախի հանրային հեռուստաընկերության պատրաստած տեսանյութում.