Կառավարությունն հավանություն տվեց Հայաստանում ներքին գործերի նախարարություն ստեղծելու մասին օրենսդրական նախաձեռնությանը։
Այս հարցը ներառված է ոստիկանության բարեփոխումների ռազմավարությունում։ Նախարարության ստեղծմամբ, ըստ արդարադատության նախարարի, կապահովվի ոստիկանության գործունեության նկատմամբ խորհրդարանական և քաղաքացիական վերահսկողությունը, ոլորտի քաղաքականության միասնական մշակումը, քաղաքացիական և ոստիկանական գործառույթների տարանջատումը և ոստիկանության շարունակական բարեփոխումների իրագործումը, ինչն էլ էականորեն կնպաստի իրավակարգի ամրապնդմանը։
Ներքին գործերի նախարարությանը ենթակա մարմիններն են լինելու ոստիկանությունը, ոստիկանության զորքերը, Միգրացիայի և քաղաքացիության ծառայությունը, ներքին գործերի նախարարության ուսումնական կենտրոնը՝ որպես պետական ոչ առևտրային կազմակերպություն։
«Իրազեկ քաղաքացիների միավորում» ՀԿ նախագահ Դանիել Իոաննիսյանը «Առաջին լրատվական»-ի հետ զրույցում ասաց, որ այս փոփոխություններով նախատեսվում է այն, ինչ որ քննարկվել էր, այն, ինչ նախատեսված էր թե՛ ոստիկանության բարեփոխումների ռազմավարությամբ, թե՛ քննարկվել էր փետրվար ամսին ոստիկանության բարեփոխումների համակարգող խորհրդում՝ վարչապետի գլխավորությամբ։ «Մեր հիմնական մտահոգությունը կապված էր նրա հետ՝ ոստիկանության զորքերը կլինե՞ն ոստիկանության կազմում, թե՞ կլինեն ոստիկանությունից առանձին՝ ՆԳՆ-ի կազմում։ Մենք համարում էին, որ պետք է լինի ոստիկանության կազմում, դրանք չեն կարող լինել ոստիկանությունից առանձին, և նախագծով այս պահին հենց այդպես էլ նշված է, որ ոստիկանության զորքերը ոստիկանության կազմում են լինելու։ Այս առումով, հիմնական կարգավորումները հենց այն են, ինչ քննարկվել է, և այն են, ինչ քաղհասարակությունը ակնկալել և պահանջել է 2018 թվականից»,-ասաց Իոաննիսյանը։
Մեր դիտարկմանը՝ մտահոգություն չկա՞, որ քաղաքական ներկա գործընթացներով պայմանավորված, այս բարեփոխումների ընդունումը կարող է բավական երկար ժամանակով հետաձգվել, Իոաննիսյանը պատասխանեց․ «Ես չգիտեմ՝ ընտրությունների արդյունքում ով կհաղթի, և Ազգային ժողովը ինչ կընդունի, ինչ չի ընդունի, բայց ամեն դեպքում կառավարության շրջանառած նախագիծը այն է, ինչ որ համապատասխանում է ժողովրդավարական հասարակությունում պետության կողմից հասարակական կարգի ապահովման, հանցագործությունների բացահայտման, նախականխման և, գլոբալ առումով, արդարության ապահովման նպատակների իրականացման կառուցվածքին։ Այս նախագիծը ամբողջությամբ այդ տրամաբանության մեջ է և հուսով եմ, որ այն կընդունվի՝ անկախ նրանից, թե ով կլինի հաջորդ խորհրդարանում»։
Մեր զրուցակիցը նշեց նաև, որ օրենքի ընդունումից հետո լուրջ խոչընդոտներ, իմպլեմենտացիոն խոչընդոտներ չկան։ Օրենքը կընդունվի, նախարարությունը կստեղծվի, նախարար կնշանակվի, ու ամեն ինչ կսկսի բնականոն հունով ընթանալ։
Կատարվող կարևոր փոփոխություններից Իոաննիսյանը համարում է մի շարք գործառույթների ապառազմականացումը։ Օրինակ՝ ապառազմականացվում են քաղաքացիներին մատուցվող մի շարք ծառայություններ՝ վարորդական վկայականի տրամադրումը, անձնագրային, վիզաների վարչության տրամադրած ծառայությունները։ Բոլորը դառնում են քաղաքացիական, և այդ առումով ավելանում է թափանցիկությունը, էֆեկտիվությունը։
Կարևոր է նաև Միգրացիոն ծառայությունը ՆԳՆ-ի կազմ բերելը, քանի որ մինչ այդ անտրամաբանական էր, որ այդ ծառայությունը գործում էր տարածքային կառավարման նախարարության կազմի մեջ։ Այդ կառույցները բոլորովին այլ պետական քաղաքականություն են իրականացնում։
Իոաննիսյանը նշեց, որ իրենք կարծում են, որ ներքին գործերի նախարարության կազմում պետք է լինեն նաև սահմանապահ զորքերը և փրկարար ծառայությունը։ «Սրանք էլ են մեր առաջարկները, նախագծում դրանք չկան, բայց քննարկումների արդյունքում եկանք նրան, որ առաջին փուլով ստեղծվի նախարարությունը, հետո քննարկենք այս առաջարկները»,- եզրափակեց Իոաննիսյանը։
