Նախօրեին ՀՀ նախագահ Արմեն Սարգսյանը պաշտոնական այցով մեկնել է Վրաստան։ Արցախյան երկրորդ պատերազմում պարտությունից և Հարավային Կովկասում ռուս-թուրքական նոր աշխարհակարգի հաստատումից հետո հայ-վրացական հարաբերությունների մակարդակը, որակը, խորությունը էապես պետք է փոխվի։ Երկու երկրների նախագահների նախօրեին հնչեցրած հայտարարությունների իրապես բովանդակային շեշտադրումները հույս են ներշնչում, որ երկուստեք կա այդ գիտակցումը։
Վրաստանի ուղղությամբ ահռելի դիվանագիտական աշխատանք պետք է կատարել։ Վրաստանը Հայաստանի համար ավելին է քան հարևան պետությունը։
Եվրատլանտյան դաշինքի անդամակցությանը ձգտող Վրաստանը չափազանց կարևոր առաքելություն է իրականացնում տարածաշրջանում անվտանգային ու ռազմական հավասարակշռության ապահովման գործում՝ հատկապես Հայաստանում ռուսական ռազմական ներկայության պարագայում։
Հայաստանը, կրկնում ենք, Վրաստանի կայունության և անվտանգության առաջնային շահառուներից մեկն է, քանի ռուս-վրացական լարվածության շահառուներ են իրենց հերթին մեր հակառակորդ երկրները՝ Թուրքիան ու Ադրբեջանը։
Հայաստանին մշտապես փորձելու են օգտագործել Վրաստանի դեմ տարբեր դավադիր սցենարներում։ Փորձելու են առաջին հերթին ռուսական շրջանակները։
Փորձելու են՝ խաղարկելով ինչպես Վրաստանում ազգայնական տրամադրությունների բորբոքումը, այնպես էլ Հայաստանում ռուսական ռազմական ներկայությունը։
Այս պայմաններում Հայաստանի քաղաքական իշխանությունը պետք է անընդհատ ռեժիմով աշխատի վրացի բարեկամների հետ՝ որևէ սադրանք բացառելու և իրապես բարեկամական երկրների բնորոշ հարաբերությունները պահպանելու համար։
Հայաստանի անվտանգության համակարգը անցնում է նաև Վրաստանով։ Հետևաբար Վրաստանի կայունությունն ու անվտանգությունը նաև մեր անվտանգության երաշխիքներից է։
—
Լուսանկարում՝ Վրաստանի նախագահ Սոլոմե Զուրաբիշվիլիի կողմից հրապարակված Վրաստանի հյուրերի պատվո մատյանում Հայաստանի նախագահ Արմեն Սարգսյանի գրառումը, որում հստակ երեւում է գրառմանն ուղեկցող՝ Արարատի պատկերը և դրա ներքո արված «ջերմ բարևներ Հայաստանից» գրառումը:
