Թուրքական Hürriyet թերթում այսօր հրապարակվել է «Ի՞նչ է ասել Սարգսյանը» խորագրով մի հոդված, որում անդրադարձ է կատարվում Սերժ Սարգսյանի ծաղկաձորյան հայտնի հայտարության շուրջ ծավալված զարգացումներին։
Նշվում է, որ հուլիսի 26-ին թերթում հրապարակվել է Ներդուն Հաջըօղլուի «Ղարաբաղը մենք վերցրինք, Արարատ լեռն էլ ձեր սերնդին թողեցինք» խորագրով հոդվածը, ինչի կապակցությամբ խմբագրությունը ստացել է իրենց ընթերցողներից Քյուրշաթ Բոզքուրթի բողոք-դիտարկումը։
Վերջինս նշել է, որ Սարգսյանը բառացիորեն չի նշել «Ղարաբաղը մենք վերցրինք, Արարատ լեռն էլ ձեր սերնդին թողեցինք» արտահայտությունը։ Փոխարենը, «Ղարաբաղի վերցնելու մասին» նշելուց հետո Սարգսյանն ասել է. «Յուրաքանչյուր սերունդ իր պարտականությունն ունի»՝ հավելելով, որ «Շատ դեպքերում հողի չափերով չէ երկրի կշիռը որոշվում»։
Այս առթիվ Բոզքուրթը նշում է, որ հուլիսի 26-ի հոդվածի վերնագիրը համահունչ չէ հոդվածի բովանդակությանը, և որ հոդվածագիրը Սարգսյանի խոսքերը խեղաթյուրված է ներկայացրել։ Hürriyet-ն ընդունել է իր սխալը՝ հակիրճ ներկայացնելով դրա արդյունքում ծավալված զարգացումները.
«Հուլիսի 26-ը մեծ արձագանք գտավ Թուրքիայում, ինտերնետային կայքերն իրենց էջերում տեղադրեցին այդ հոդվածը՝ վկայակոչելով Hürriyet-ին։ Նույն օրը Թուրքիայի ԱԳՆ-ն քննադատեց այդ հայտարարությունը։ Ադրբեջան այցելած Թուրքիայի վարչապետ Էրդողանը հայտարարեց, որ դա պետական գործչին հարիր հայտարարություն չէ, Սարգսյանը պատմական սխալ է գործել և պետք է ներողություն խնդրի։ Ապա Հայաստանի փոխարտգործնախարար Շավարշ Քոչարյանը հայտարարեց, որ Սարգսյանի խոսքերն աղավաղվել են և այլն»։
Hürriyet-ն անհրաժեշտ է համարել հիշեցնել Թուրքիայի լրագրողների իրավուքների և պատասխանատվության մասին հռչակագրի 3-րդ հոդվածը, որը լրագրողներին պարտավորեցնում է պաշտպանել խաղաղության գաղափարը և խուսափել մարդկանց, հասարակությունների ու ազգերի միջև ատելություն ու թշնամանք սերմանելուց։
