ԵԱՀԿ Մինսկի խմբի համանախագահները հայտարարություն են տարածել, որում կոչ են արել հնարավորինս շուտ բարձր մակարդակով քաղաքական երկխոսություն սկսել վերջնական, համապարփակ և կայուն կարգավորման ձեռքբերմանը՝ կողմերին լավ հայտնի տարրերի ու սկզբունքների հիման վրա:
«Լավ հայտնի սկզբունքները» ներառում է նաև Արցախի կարգավիճակի հարցը, արդյոք սա չի նշանակում է, որ համանախագահները չեն ճանաչում պատերազմի արդյունքները որպես «վերջնական կարգավորում»։ Թեև, Ռուսաստանը Բաքվի հետ հայտարարում է հակամարտության լուծվածության մասին։Թեմայի շուրջ «Առաջին լրատվական»-ը զրուցել է Արցախի Հանրապետության արտաքին գործերի նախարար Դավիթ Բաբայանի հետ:
Հայաստանյան, ինչպես նաև արտասահմանյան մամուլն այս օրերին ակտիվորեն քննարկում էր Ալիևի կազմակերպած ատելության շոուն՝ «պուրակի» բացումը, որտեղ ներկայացված էին հայ զինվորների մանեկեններ, ռազմավարը: Շատերի կարծիքով՝ սա խոսում է նաև Ադրբեջանի ներսում առկա խնդիրների, ինչպես նաև անձամբ Ալիևի խնդիրների մասին:
«Դա, իհարկե նաև ներքին լսարանի համար է արվել, բայց այլ տեսակետից՝ դաստիարակչական տեսակետից,- նշեց Արցախի հանրապետության ԱԳ նախարար Դավիթ Բաբայանը:- Այսինքն՝ դա նշանակում է, որ հայերին, որպես բարբարոսներ, անմարդկային էակներ ներկայացնելը հայատյացության հերթական փորձն է: Այդպիսի «թանգարանի» բացումը պատգամ է իր ժողովրդին՝ ատելությա՛մբ լցվեք, ոչինչ չի վերջացել: Նրանք հայտարարում են, որ Երևանն էլ են ուզում վերցնել:
Եվ սա պատգամ է նաև մեզ՝ վհատեցնելու, վախեցնելու համար: Սա, իհարկե, բարոյահոգեբանական տեսանկյունից, մարդու իրավունքների և միջազգային իրավունքի տեսանկյունից աննորմալ երևույթ էի. ատելություն է սերմանվում մի ողջ ազգի նկատմամբ… Սա մեծ վտանգ է»:
Դավիթ Բաբայանի դիտարկմամբ՝ եթե ուզում ենք, որ Արցախը պահպանի իր ինքնիշխանությունը, ամբողջ հայությունը պետք է սատարի, որ Արցախը լինի աշխարհաքաղաքական սուբյեկտ… «Արցախը դեռևս կարևոր դերակատարություն ունի Անդրկովկասի աշխարհաքաղաքական քարտեզում, և մեր լինելիությունը շատ կարևոր է, բազմաթիվ հարցեր է լուծում: Արցախիի ձայնը պետք է լսելի լինի կարևորագույն համազգային հարցերի շուրջ: Հայաստանի միջազգային կշիռը մեծապես պայմանավորված է Արցախով, չլինի Արցախը, չի լինի նաև Հայաստանը»,- ընդգծեց Բաբայանը:
Մանրամասները՝ տեսանյութում:
