«Ես, անկեղծ ասած, չեմ հասկանում, թե ինչ վատ բան կա դրանում, երբ պետությունը աջակցել է բիզնեսին, որ իր աշխատողների աշխատավարձը վճարեն»,- այս մասին այսօր կառավարության հարց ու պատասխանի ժամանակ ասաց ՀՀ վարչապետ Նիկոլ Փաշինյանը, անդրադառնալով կորոնավիրուսի տնտեսական հետևանքները չեզոքացնող ծրագրերին, մասնավորապես՝ բիզնես ոլորտի աշխատավարձերի փոխհատուցումներին:
«Բա որ էդ մարդիկ աշխատել են, աշխատավարձ չստանա՞ն, դա լա՞վ է: Բա հետո պիտի ասեինք՝ եկեք սոցիալական աջակցության ծրագիր իրականացնենք, էդ մարդկանց «Փարոս»-ով աջակցություն տանք, հացի փող տանք, ջրի փող տանք: Բայց օգնել ենք, որ մարդիկ աջակցություն ստանան»,- ասաց Նիկոլ Փաշինյանը:
Վարչապետի խոսքով, այս տարբերակով աջակցել են, որ մարդիկ վճարեն հարկերը։ Նա նշեց, որ սա բիզնեսով զբաղվողների ընտրությունն է եղել. «Սա ինչում է վատ: Մենք մարդկանց չենք պարտադրել՝ եկեք սա ստացեք այս ինչ նպատակի համար»: