Աշխարհի ֆոնդային բորսաներում գրանցվող անկումները կարող են դրական ազդել Հայաստանում ներդրումների վրա: «Առաջին լրատվականի» հետ զրույցում ԱԺ ՀՅԴ խմբակցության պատգամավոր Արծվիկ Մինասյանը նշեց, որ ՀՀ-ի ֆոնդային շուկան ընդհանրապես ինտեգրված չէ միջազգային ֆինանսական շուկաներին և, հետևաբար, ուղիղ կապ չկա այս երկուսի միջև, սակայն վերլուծությունները վկայում են, որ կան տարբեր տիպի ներդրումներ և ներդրողների կողմից սպասումներ, որոնք այս դեպքում կարող են ՀՀ համար դրական ազդեցություն ունենալ, եթե իհարկե Հայաստանում որոշ հրատապ գործողություններ ձեռնարկվեն:
Նրա խոսքով, Standard & Poor’s գործակալության կողմից ԱՄՆ-ի վարկային վարկանիշի իջեցումը նշանակում է, որ ներդրումներ ապահովելու համար ԱՄՆ-ը ստիպված պետք է բարձրացնի տոկոսադրույքները, որպեսզի կարողանա վարկանիշի իջեցման դիմաց բարձր տոկոսադրույքով շահագրգռել ներդրողներին:
«Սա նշանակում է, որ եթե ՀՀ-ում իրականացվի տոկոսադրույքի իջեցման քաղաքականություն, և մրցակցային տոկոսադրույքի քաղաքականություն այդ երկրների հետ, ապա կարող է ներդրումների որոշակի հոսք ապահովվել Հայաստանի համար: Բայց չմոռանանք, որ Հայաստանում ներդրումների առավել լայն հոսք ապահովելու տեսանկյունից բազմաթիվ նոր և հիմնարար քայլեր պետք է իրականացվեն՝ սկսած սեփականության իրավունքի պաշտպանությունից, վերջացրած շուկաների բացման քաղաքականությամբ: Այլ կերպ ասած՝ հակամենաշնորհային քաղաքականություն պետք է իրականացվի, որպեսզի այդ ներդրումները հոսեն ՀՀ»,- ասաց Ա.Մինասյանը:
Ա.Մինասյանը հավելեց, որ կան նաև փոքր թվով ներդրողներ, ովքեր ներդրումներ են իրականացրել ամերիկյան շուկաներում և միջազգային տարբեր ֆինանսական կենտրոններում ներդրումների հիման վրա և, բնականաբար, նրանք կունենան որոշակի ֆինանսական կորուստ, իսկ դա նշանակում է Հայաստան մուտք գործող տրանսֆերտների որոշակի կրճատում:
