Վերջին օրերին պարբերաբար ահազանգեր ենք ստանում Նորքի ինֆեկցիոն հիվանդանոցից կորոնավիրուսով հիվանդների հարազատներից։ Նրանք նշում են, որ հիվանդանոցից պահանջում են գալ և անձամբ խնամել իրենց հիվանդին, ընդ որում՝ բացարձակ հաշվի չի առնվում՝ խնամակալը կորոնավիրուսով վարակվե՞լ է, թե՞ ոչ, հակամարմիններ ունի՞, թե՞ կարող է իր հարազատին խնամելուց վարակվել և պառկել կողքի մահճակալին։ «Ես բացարձակ չեմ հասկանում՝ ինչ է նշանակում վարակակրին խնամել։ Հա, հասկանալի է, մեր հարազատն է, մեր սիրտը ցավում է, բայց սենց վարակի դեմ չեն պայքարում։ Փողոցում ստիպում են, որ դիմակ դնես, բայց հետո զանգում են և ասում՝ եկեք ձեր հիվանդին ինքներդ խնամեք»,- «Առաջին լրատվական»-ի հետ զրույցում դժգոհեց մի կին՝ որն այդ պահին էլ ինֆեկցիոն հիվանդանոցում խնամում էր իր հարազատին։ Կնոջ խոսքերով՝ պալատում 3-4 հիվանդ կա կորոնավիրուսուվ, և բոլորին էլ իրենց հարազատներն են խնամում, սնունդը բերում են հարազատները, կերակրում են իրենց հիվանդներին։ «Ոչ մի պայման չկա, արդեն երկու շաբաթ է՝ աթոռին ենք քնում՝ ինչ է թե մեր հիվանդի կողքին լինենք։ Ես էլի չեմ դժգոհում, իմ հարազատն է, բայց կարծում եմ, որ անտրամաբանական է վարակված մարդուն հարազատի կողմից խնամելը։ Բոլոր դժվարություններից բացի, սա վարակը փոխանցելու, տարածելու ևս մի տարբերակ է»,- ասաց մեր զրուցակիցը՝ ավելացնելով, որ նման բազմաթիվ դեպքեր կան։
«Առողջապահության նախարարությունից «Առաջին լրատվական»-ին փոխանցեցին, որ «նախարարությունը չի խրախուսում խնամակալների ներկայությունը կորոնավիրուսով հիվանդների մոտ»։ Բայց նաև նշեցին, որ մի քանի բացառություն եղել է՝ հաշվի առնելով հիվանդի վիճակն ու նրա ցանկությունը։
Մեր հարցին՝ բուժաշխատողների պակա՞սն է պատճառը, որ կորոնավիրուսով հիվանդներին հիվանդանոցներում սկսել են խնամել իրենց հարազատները, նախարարության խոսնակը պատասխանեց. «Եթե այսպես շարունակվի, մենք մահճակալային ֆոնդի պակաս կունենանք նույնիսկ, իսկ բուժաշխատողները աշխատում են վերջին ճիգով։ Նրանք աշխատում են 24/7 ռեժիմով։ Մենք անում ենք առավելագույնը։ Մենք առնչվում ենք երրորդ ալիքի հետ, կայուն ծանր վիճակ է ու կարող է ավելի վատ վիճակ գրանցվել»։
Լուսանկարը՝ Armeniasputnik-ի