Արտահերթ խորհրդարանական ընտրությունների հավանական մասնակիցների մոտ արդեն նկատելի է ընտրացուցակները կազմելու մրցավազք։ Դա ենթադրո՞ւմ է, որ բոլորը կողմ են խաղի այն կանոնին, որ շրջանառվում է․ «Առաջին լրատվական»-ի հարցին «Իրազեկ քաղաքացիների միավորում» ՀԿ ղեկավար Դանիել Իոաննիսյանը պատասխանեց․ «Գիտեք՝ իրականում չի կարելի ասել, որ մեխանիկորեն ենթադրում եմ․ 2017 թվականին էլ բոլորը դեմ էին խաղի կանոնին՝ ռեյտինգային ընտրակարգին, բայց, այնուհանդերձ, համարյա բոլորը մասնակցեցին։ Այս առումով կարևոր է հասկանալ հետևյալը՝ սա է քաղաքական մրցապայքարի խաղի կանոնը։ Այսինքն՝ եթե ընտրությունները քաղաքական մրցապայքարի տրամաբանությամբ պետք է լինեն, ապա խաղի կանոնը սա է։ Ռեյտինգային ընտրակարգը քաղաքական մրցապայքարի հետ որևիցե աղերս չունի»։
«Հանուն Հանրապետության» կուսակցության ղեկավար մարմնի անդամ Վահագն Մարտիրոսյանն էլ ասաց․ «Ես ռեյտինգային ընտրակարգի վերացումով իրապես քաղաքական գաղափարների մրցապայքարի հնարավորություն եմ տեսնում։ Սրա «քաղցրությունն» այն է, որ այստեղ չի լինելու ֆինանսա-տնտեսական հնարավորությունների բախում, այլ լինելու է գաղափարների, ծրագրերի բախում։ Ես ընդհանրապես չեմ բացառի ֆինանսա-տնտեսական հնարավորությունները, բայց այս փոփոխություններով այն կքչանա, որովհետև, այնուամենայնիվ, ընտրություններում ֆինանսները որոշակի դեր խաղում են»։
Իսկ փաստաբան Գևորգ Դավթյանն էլ ասաց․ «Ես կարծում եմ, որ այս ընտրապայքարին մասնակցող կուսակցությունների եթե ոչ 90 տոկոսը, ապա գոնե 70-80 տոկոսը համոզվածություն ունեն, որ իրենք չեն հաղթահարելու այդ շեմը։ Այստեղ պետք է հասկանանք, թե այդ դեպքում որն է այդ կուսակցությունների կամ դաշինքների մասնակցության նպատակը։ Կարծում եմ, որ ցանկացած քաղաքական սուբյեկտ ընտրություններին մասնակցելով՝ մոտավորապես գիտի, թե ինչքանի է ինքը ձգտելու»։