Հայաստանը շրջանցող Բաքու-Թբիլիսի-Կարս երկաթուղու շինարարությունը նախատեսվում է ավարտել 2012 թ.-ին: Թե ի՞նչ ազդեցություն կունենա այս նախագիծը ՀՀ տնտեսության վրա՝ «Առաջին լրատվականը» խնդրեց մեկնաբանել Հայաստանի գործատուների հանրապետական միության նախագահ Գագիկ Մակարյանին:
«Տարածաշրջանում տարբեր կոմունիկացիաները դրական են լինելու պետության համար՝ անկախ նրանից այդ պետությունը մասնակցում է տվյալ նախագծին, թե ոչ»,- հայտարարեց Գ. Մակարյանը:
Նրա խոսքով, ներկայում Հայաստանը զարգացնում է հարաբերություններն Իրանի հետ՝ գազաֆիկացման, ճանապարհների, երկաթգծի, կամ նավթամթերքների վերամշակման գործարան կառուցելու և այլ ծրագրերով: Գ.Մակարյանը շեշտեց, որ ցանկացած հաղորդակցության ուղիներ, որոնք կլինեն Ադրբեջանի, Վրաստանի, Թուրքիայի, Հայաստանի կամ Իրանի շահերի տիրույթում, ծառայելու են տարածաշրջանի շահերին, որովհետև մուլտիպլիկատոր ազդեցություն են ունենալու:
Գ.Մակարյանը նշեց, որ որքան երկրների միջև կապ կա կամ տարածաշրջանում թափանցիկություն կա, այնքան դա ներդրումների ներգրավման և տնտեսական զարգացման առումով հետաքրքրություն է ներկայացնելու այլ պետությունների համար. «Պետք է նայենք եվրոպական երկրներին, որովհետև ամեն մի խոչընդոտ միշտ այդ երկրների գործարարների մոտ բացասական կարծիք է առաջացնում, և այդ տարածքները համարվում են փակ, ռիսկային կամ կոնֆլիկտային: Ամեն մի լուծում, եթե նույնիսկ Հայաստանը դրանից դեռ չի օգտվում, դրական նշանակություն է ունենալու ընդհանուր մտածելակերպի մեջ խոչընդոտների հաղթահարման առումով»:
Գ.Մակարյանի համոզմամբ՝ մենք չպետք է դժգոհենք քաղաքական առումով, որ դա մեզ մեկուսացնող ծրագիր է. «Կարող է այդ ծրագրի պոչին մենք հետագայում ավելի հեշտ միանանք Կարս-Գյումրի հատվածով»: Ըստ նրա՝ ժամանակի ընթացքում, երբ այդ տնտեսական շահերը կգերիշխեն, մենք կկարողանանք միանալ երկաթգծին և անգամ կշահենք այն առումով, որ փոքր հատվածի ծախս կունենանք:
Գ.Մակարյանը նկատեց, որ Վրաստանն ու Ադրբեջանն էլ այնքան շատ չեն շահում, քանի որ նրանք հաղորդակցության ուղիներ ունեն և այս երկաթգծի հույսին չեն:
