ԱԺ ՀՀԿ-ական պատգամավոր Հովհաննես Սահակյանը, «Առաջին լրատվականի» հետ զրույցում խոսելով նախագահի կողմից աշնանը կատարվելիք հնարավոր փոփոխությունների և դրանց հիմքերի մասին, հայտնեց.
«Ցանկացած պետություն, երկիր, կառույց եթե դինամիկայի մեջ է և որոշակի առումով զարգանում է, ապա մշտապես պետք է ենթարկվի փոփոխությունների։ Այս առումով մեր երկրում փոփոխությունները անխուսափելի են, և դա օրինաչափ է։ Այլ հարց է, թե շեշտադրումը ինչ առումով է։ Եվ եթե մենք այդ հայացքով դիտարկենք նաև վերջին փոփոխությունները, նշանակումները՝ սկսած կրթության և արդարադատության նախարարություններից, գլխավոր զինդատախազից, պետգույքի կառավարման վարչությունից, վերջին նշանակումների տրամաբանությունը ցույց է տալիս, որ այդ փոփոխությունները նպատակային են։ Այն երիտասարդ գործընկերները, ովքեր այսօր լծված են այդ գործերին՝ և՛ կրթված, և՛ երիտասարդ, և՛ անաչառ են»։
Հ.Սահակյանը նաև հավելեց, որ եթե նախագահ Սարգսյանը որոշում է, որ պետք է փոփոխություն կատարի, դա նախագահի գործառույթն է։ Եթե փոփոխություն լինի, միայն այս տրամաբանությունից ելնելով կլինի՝ հաշվի առնելով նաև նախագահի անձը և վերաբերմունքը երկրի և պետության հանդեպ։
«Ոլորտ առ ոլորտ վերլուծություններ են կատարվում, կարող եմ ասել, որ ապրիորի որևէ բան չի արվում։ Եթե կա որոշակի դժգոհություն, ապա իրականացվում են համապատասխան փոփոխություններ»։
