Շաբաթ օրը Հայաստանի նախագահը քաղաքական ուժերին հանդիպման հրավիրեց, որպեսզի քննարկեն ներքաղաքական իրավիճակը, ճգնաժամային իրավիճակից ելքեր գտնելու ուղիները։ «Բարգավաճ Հայաստան» կուսակցության նախագահ Գագիկ Ծառուկյանը հայտարարեց, որ ինքը չի մասնակցի Արմեն Սարգսյանի հետ հանդիպմանը, քանի որ հստակ օրակարգ չկա։ Բայց, միևնույն ժամանակ, նա նշեց, որ կհանդիպի վարչապետ Նիկոլ Փաշինյանի հետ, թեև, այս պարագայում էլ որևէ օրակարգի մասին, կարծես թե, հստակ խոսք չկա։
Տեսակետ կա, որ վարչապետի հետ հանդիպումից հետո «Բարգավաճ Հայաստանը» կլքի «16+»-ի շարքերը, ինչպիսի՞ն է ձեր տեսակետը․ «Առաջին լրատվական»-ի հարցին քաղաքագետ Էմիլ Օրդուխանյանը պատասխանեց․ «Դա բավականին իրատեսական սցենար կարող է լինել, որովհետև դրա համար կան նախադրյալներ։ Վերջին 1-2 շաբաթվա ընթացքում խստագույնս պասիվացել են «Բարգավաճ Հայաստանի» ներկայացուցիչները «16+» ֆորմատում։ Դա ուղիղ ցուցիչներից մեկն է, որ «Բարգավաճ Հայաստան» կուսակցությունը, իհարկե՝ պայմանավորված քաղաքական իրավիճակով, կարող է դուրս գալ այդ ձևաչափից, որովհետև, ըստ էության, միակ քաղաքական ուժն է, որը ներկայացված է խորհրդարանում ու նաև մասնակցում է այդ ձևաչափին։ Այսինքն՝ եթե «Բարգավաճ Հայաստանը» դուրս է գալիս, ապա այս ձևաչափը դառնում է արտախորհրդարանական քաղաքական մի միավոր, որն ընտրությունների ժամանակ խորհրդարան անցնելուն բավարարող որևէ քվե չստացավ։ Հետևաբար՝ ստացվում է, որ այն կվերածվի քաղաքական մի միավորի, որի մեջ կլինեն կուսակցություններ, որոնք ժողովրդի կողմից չեն արժանացել այն վստահությանը, որպեսզի ներկայացված լինեն խորհրդարանում»։
Մանրամասները՝ տեսանյութում։