Թուրքական Zaman թերթի փոխանցմամբ՝ Թուրքիայում հեշտացվել է օտարազգի զբոսաշրջիկների կողմից Արարատ լեռ բարձրանալու գործընթացը։ Այսուհետ նրանք լեռան գագաթ բարձրանալու համար ստիպված չեն լինի ստանալ Թուրքիայի ներքին գործերի նախարարության ու Ազգային հետախուզական կազմակերպության (MIT) թույլտվությունը։
Այժմ դրանով զբաղվելու է Արտաքին գործերի նախարարությունը, ով լեռ բարձրանալու հայտերի ստացումից հետո դրանք ուղարկելու է Աղրըի ու Իգդիրի նահանգներ (լեռան 35 տոկոսը Իգդիրի, 65 տոկոսը՝ Աղրըի վարչական տարածքում է), որոնք էլ համապատասխան որոշում են ընդունելու։ Այս ամենն արվում է ավելորդ քաշքշուկներից խուսափելու համար։
Հիշեցնենք, որ այս տարվա ապրիլի 4-ին թուրքական Hürriyet թերթը գրել էր որ, թուրքական կառավարության որոշմամբ՝ Արարատ լեռ բարձրանալու թույլտվության իրավասությունը Թուրքիայի Գլխավոր շտաբից հանձնվել է Աղրըի նահանգապետարանին. «Դրա հետ կապված` անվտանգության գործառույթները նույնպես տրվել են Աղրըի նահանգապետարանին, որն այսուհետ պետք է Արարատ լեռ բարձրանալու գործընթացը նախապես համաձայնեցնի բնապահպանության և անտառտնտեսության նախարարության հետ: Այժմ մենք բավական հեշտացրել ենք լեռ բարձրանալու գործընթացը: Մեր քաղաքացիները կարող են այդ կապակցությամբ ուղղակիորեն դիմել մեզ, իսկ օտարազգիների համար այդ գործընթացն իրականացվում է դեսպանատների միջոցով: Անվտանգության գործառույթները դրված են Աղրըի նահանգապետարանի վրա: Այժմ մեծ ուշադրություն կհատկացվի լեռան բնապահպանական խնդիրներին»։
Արարատ լեռը (նկարում պատկերված է լեռան հակառակ` թուրքական, կողմը) Թուրքիայում պաշտոնապես զբոսաշրջային վայր է հայտարարվել 1982 թվականին: Ինչ վերաբերում է Արարատ լեռ բարձրանալու գործընթացում Գլխավոր շտաբի ներգրավվածությանը, ապա դա պայմանավորված է նրանով, որ լեռան վրա թուրքական ռազմաբազա է տեղակայված: