«Բոլոր քաղաքական ուժերը պետք է գիտակցեն, որ այլընտրանք չունենք, բացի համագործակցելուց, բացի երկխոսելուց: Ե՛վ իշխանությունը, և՛ ընդդիմությունը պետք է էմոցիաները մի կողմ թողնեն և, հանուն երկրի ու հանուն պետականության, քննարկեն իրավիճակից դուրս գալու ելքերը: Կարծում եմ՝ մենք ունենք համախոհության գալու ներուժը»,- այս մասին «Առաջին լրատվական»-ի հետ զրույցում նշեց ԱԺ պատգամավոր Սերգեյ Բագրատյանը:
ԱԺ «Իմ քայլը» խմբակցության պատգամավոր Հովիկ Աղազարյանը կարծիք հայտնեց, որ ամեն ինչ իր տեղը կընկնի, երբ որ ԳՇ նոր պետ նշանակվի: «ԳՇ հայտնի հայտարարությունը պիկն էր, որ ընդդիմությունը կարող էր համապատասխան ձևով օգտագործել, չի ստացվում, բայց չեմ կարծում, թե ընդդիմության պայքարի ալիքը շուտ կմարի, պետք է մտածել արտահերթ ընտրություններն օրակարգ բերելու մասին»,- նշեց Աղազարյանը:
Անդրադառնալով ՀՀ առաջին նախագահ Լևոն Տեր-Պետրոսյանի օրերս արված հայտարարությանը՝ Սերգեյ Բագրատյանը նկատեց, որ այն կոշտ քննադատություն է ներկա իշխանության հասցեին, բայց անուղղակիորեն նպատակը խնդրի հանգուցալուծումն է. «Առաջին նախագահը դիվանագիտական քայլ է արել՝ կոշտ քննադատելով իշխանությանը, որպեսզի ընդունելի լինի իր գլխավոր ասելիքը: Այսինքն՝ շեշտադրել և ողջունել է զինվորականների զուսպ պահվածքը, բայց կարևորել է խնդրի հանգուցալուծումը»:
«Խիստ լարված իրավիճակ է. հետպատերազմական և նաև կովիդով պայմանավորված սթրեսը հանրությանը անհանգիստ իրավիճակում է պահում, հատկապես այն ֆոնին, որ ընդդիմությունը, օգտագործելով իր լրատվամիջոցները, անընդհատ փորձում է լարվածության մեջ պահել հանրությանը՝ հույս ունենալով այդ միջոցով իշխանությանը ծանր վիճակի մեջ դնել, և նաև միտինգներով ճնշումը աստիճանաբար մեծացնելով՝ վերցնել իշխանությունը: Սակայն առանց ընտրության հնարավոր չէ իշխանություն ձևավորել»,- նշեց Բագրատյանը:
Աղազարյանը հավելեց, որ եթե ԼՀԿ-ն և ԲՀԿ-ն հուշագիր ստորագրեն, «Իմ քայլը» կգնա արտահերթ ընտրությունների:
Մանրամասն՝ տեսանյութում:
